ਕੇਸਰੀ ਵਿਰਾਸਤ ਨਿਊਜ਼ ਨੈੱਟਵਰਕ: ਹਰਿਆਣਾ ਦੇ ਨਾਰਨੌਲ ਵਿੱਚ ਸ਼ੁੱਕਰਵਾਰ ਨੂੰ ਮਹਿਲਾ ਪੁਲਿਸ ਮੁਲਾਜ਼ਮਾਂ ਨੂੰ ਜ਼ਿੰਦਾ ਸਾੜਨ ਦੀ ਕੋਸ਼ਿਸ਼ ਕੀਤੀ ਗਈ। ਬਿਜਲੀ ਚੋਰੀ ਫੜਨ ਲਈ ਗਈ ਟੀਮ ਦੀ ਸ਼ਿਕਾਇਤ ‘ਤੇ ਡਾਇਲ 112 ਦੀ ਟੀਮ ਧੂਪ ਕਲੋਨੀ ਪਹੁੰਚੀ ਸੀ। ਇੱਥੇ ਔਰਤਾਂ ਨੇ ਮਹਿਲਾ ਪੁਲਿਸ ਮੁਲਾਜ਼ਮਾਂ ਦੀ ਕੁੱਟਮਾਰ ਕੀਤੀ ਅਤੇ ਵਾਲਾਂ ਤੋਂ ਖਿੱਚ ਕੇ ਗਲੀ ‘ਚ ਲੈ ਗਏ।

 ਇਕ ਨੌਜਵਾਨ ਘਰੋਂ ਪੈਟਰੋਲ ਦੀ ਬੋਤਲ ਲੈ ਕੇ ਆਇਆ ਅਤੇ ਮਹਿਲਾ ਪੁਲਸ ਮੁਲਾਜ਼ਮਾਂ ‘ਤੇ ਛਿੜਕ ਦਿੱਤਾ। ਇਸ ਤੋਂ ਬਾਅਦ ਉੱਥੇ ਮੌਜੂਦ ਲੋਕਾਂ ਨੇ ਮਹਿਲਾ ਪੁਲਿਸ ਮੁਲਾਜ਼ਮਾਂ ਨੂੰ ਬਚਾਇਆ।

 ਹਮਲੇ ਦੀਆਂ ਵੀਡੀਓਜ਼ ਵੀ ਸਾਹਮਣੇ ਆਈਆਂ ਹਨ, ਜਿਸ ਵਿੱਚ ਕੁਝ ਔਰਤਾਂ ਇੱਕ ਮਹਿਲਾ ਪੁਲਿਸ ਮੁਲਾਜ਼ਮ ਨੂੰ ਧੱਕਾ ਦੇ ਰਹੀਆਂ ਹਨ ਅਤੇ ਉਸ ਦੇ ਵਾਲਾਂ ਤੋਂ ਖਿੱਚ ਰਹੀਆਂ ਹਨ। ਇਸ ਮਾਮਲੇ ਸਬੰਧੀ ਬਿਜਲੀ ਨਿਗਮ ਦੀ ਟੀਮ ਵੱਲੋਂ ਪੁਲੀਸ ਨੂੰ ਸ਼ਿਕਾਇਤ ਦੇ ਦਿੱਤੀ ਗਈ ਹੈ।

 ਟੀਮ ਨੂੰ ਰੋਕਣ ਲਈ ਔਰਤਾਂ ਗੇਟ ‘ਤੇ ਖੜ੍ਹੀਆਂ ਸਨ

 ਦਰਅਸਲ, ਬਿਜਲੀ ਨਿਗਮ ਦੀ ਟੀਮ ਐਸਡੀਓ ਮੁਹੰਮਦ ਅਜ਼ਹਰੂਦੀਨ ਦੀ ਅਗਵਾਈ ਵਿੱਚ ਬਿਜਲੀ ਚੋਰੀ ਦੀ ਜਾਂਚ ਲਈ ਧੂਪ ਕਲੋਨੀ ਪਹੁੰਚੀ ਸੀ। ਇੱਥੇ ਟੀਮ ਕਲੋਨੀ ਵਿੱਚ ਰਹਿਣ ਵਾਲੇ ਰਤਨ ਨਾਮਕ ਵਿਅਕਤੀ ਦੇ ਘਰ ਪਹੁੰਚੀ। ਘਰ ‘ਚ ਮੌਜੂਦ ਔਰਤਾਂ ਨੇ ਜਾਂਚ ਲਈ ਟੀਮ ਨੂੰ ਘਰ ‘ਚ ਦਾਖਲ ਨਹੀਂ ਹੋਣ ਦਿੱਤਾ। ਔਰਤਾਂ ਨੇ ਗੇਟ ‘ਤੇ ਖੜ੍ਹ ਕੇ ਟੀਮ ਦਾ ਵਿਰੋਧ ਕਰਨਾ ਸ਼ੁਰੂ ਕਰ ਦਿੱਤਾ।

 ਟੀਮ ਨੇ ਡਾਇਲ 112 ‘ਤੇ ਕਾਲ ਕੀਤੀ। ਮਹਿਲਾ ਪੁਲੀਸ ਦੀ ਸਹਾਇਕ ਸਬ ਇੰਸਪੈਕਟਰ (ਏਐਸਆਈ) ਬਿਮਲਾ ਅਤੇ ਕਾਂਸਟੇਬਲ ਮੀਨਾਕਸ਼ੀ ਈਆਰਵੀ ਗੱਡੀ ਵਿੱਚ ਸਵਾਰ ਸਨ।

 ਮਹਿਲਾ ਪੁਲਿਸ ਅਧਿਕਾਰੀ ਨੂੰ ਵਾਲਾਂ ਤੋਂ ਖਿੱਚਿਆ

 ਮੌਕੇ ’ਤੇ ਪੁੱਜੀ ਪੁਲੀਸ ਟੀਮ ਨੂੰ ਬਿਜਲੀ ਨਿਗਮ ਦੀ ਟੀਮ ਨੇ ਦੱਸਿਆ ਕਿ ਉਹ ਬਿਜਲੀ ਚੋਰੀ ਦੀ ਸ਼ਿਕਾਇਤ ’ਤੇ ਇੱਥੇ ਪੁੱਜੇ ਸਨ। ਪਰ, ਗੇਟ ‘ਤੇ ਔਰਤਾਂ ਖੜ੍ਹੀਆਂ ਹਨ, ਉਹ ਉਨ੍ਹਾਂ ਨੂੰ ਅੰਦਰ ਨਹੀਂ ਜਾਣ ਦੇ ਰਹੀਆਂ ਹਨ। ਇਸ ’ਤੇ ਏਐਸਆਈ ਬਿਮਲਾ ਨੇ ਉਥੇ ਖੜ੍ਹੀਆਂ ਔਰਤਾਂ ਨੂੰ ਪੁੱਛਿਆ ਕਿ ਉਹ ਟੀਮ ਨੂੰ ਅੰਦਰ ਕਿਉਂ ਨਹੀਂ ਜਾਣ ਦੇ ਰਹੇ? ਫਿਰ ਔਰਤਾਂ ਨੇ ਉਨ੍ਹਾਂ ਨੂੰ ਕੁੱਟਣਾ ਸ਼ੁਰੂ ਕਰ ਦਿੱਤਾ। ਉੱਥੇ ਇੱਕ ਔਰਤ ਨੇ ਮਹਿਲਾ ਪੁਲਿਸ ਮੁਲਾਜ਼ਮ ਦੇ ਵਾਲ ਫੜ੍ਹ ਕੇ ਉਸ ਨੂੰ ਖਿੱਚ ਲਿਆ।

 ਪੈਟਰੋਲ ਲਿਆਇਆ ਅਤੇ ਮਹਿਲਾ ਪੁਲਿਸ ਮੁਲਾਜ਼ਮਾਂ ‘ਤੇ ਛਿੜਕਿਆ

 ਇਸ ‘ਤੇ ਲੋਕਾਂ ਨੇ ਦਖਲ ਦਿੱਤਾ ਪਰ ਕਾਫੀ ਦੇਰ ਤੱਕ ਔਰਤਾਂ ਕੋਲੋਂ ਛੁਡਵਾ ਨਹੀਂ ਸਕੇ। ਦੋਸ਼ ਹੈ ਕਿ ਹੰਗਾਮੇ ਦੌਰਾਨ ਰਤਨ ਦਾ ਬੇਟਾ ਰਾਹੁਲ ਘਰੋਂ ਪੈਟਰੋਲ ਦੀ ਬੋਤਲ ਲੈ ਕੇ ਆਇਆ। ਉਸ ਨੇ ਮਹਿਲਾ ਪੁਲੀਸ ਮੁਲਾਜ਼ਮਾਂ ’ਤੇ ਪੈਟਰੋਲ ਛਿੜਕ ਦਿੱਤਾ। ਇਸ ਤੋਂ ਬਾਅਦ ਪੁਲੀਸ ਦੀ ਗੱਡੀ ’ਤੇ ਪੈਟਰੋਲ ਵੀ ਛਿੜਕਿਆ ਗਿਆ। ਉਥੇ ਲੋਕਾਂ ਨੇ ਦਖਲ ਦੇ ਕੇ ਮਹਿਲਾ ਪੁਲਸ ਮੁਲਾਜ਼ਮਾਂ ਨੂੰ ਛੁਡਵਾਇਆ।

 ਏਐਸਆਈ ਬਿਮਲਾ ਨੇ ਦੱਸਿਆ ਕਿ ਔਰਤਾਂ ਸਾਨੂੰ ਅੰਦਰ ਜਾਣ ਲਈ ਕਹਿ ਰਹੀਆਂ ਸਨ। ਅਸੀਂ ਉਨ੍ਹਾਂ ਨੂੰ ਕਿਹਾ ਕਿ ਬਿਜਲੀ ਦੀ ਟੀਮ ਨੇ ਚੋਰੀ ਦੀ ਜਾਂਚ ਕਰਨੀ ਹੈ, ਇਸ ਲਈ ਉਨ੍ਹਾਂ ਨੂੰ ਅੰਦਰ ਜਾਣ ਦਿੱਤਾ ਜਾਵੇ। ਇਸ ‘ਤੇ ਔਰਤਾਂ ਨੇ ਹਮਲਾ ਕਰ ਦਿੱਤਾ। ਜਦੋਂ ਸਾਡੀ ਟੀਮ ਨੇ ਉਨ੍ਹਾਂ ਨੂੰ ਗੱਡੀ ਵਿੱਚ ਬਿਠਾਉਣ ਦੀ ਕੋਸ਼ਿਸ਼ ਕੀਤੀ ਤਾਂ ਉਨ੍ਹਾਂ ਨੇ ਮਹਿਲਾ ਪੁਲੀਸ ਮੁਲਾਜ਼ਮਾਂ ਨੂੰ ਵਾਲਾਂ ਤੋਂ ਖਿੱਚ ਲਿਆ ।