ਜਲੰਧਰ, (ਕੇਸਰੀ ਨਿਊਜ਼ ਨੈੱਟਵਰਕ) : ਭਾਰਤ ਦੀ ਵਿਰਾਸਤ ਅਤੇ ਆਟੋਨਾਮਸ ਸੰਸਥਾ, ਕੰਨਿਆ ਮਹਾਂ ਵਿਦਿਆਲਾ, ਜਲੰਧਰ ਦੇ ਬਾਇਓਟੈਕਨਾਲੋਜੀ ਵਿਭਾਗ ਦੁਆਰਾ ਜੈਨੇਟਿਕ ਕਾਉਂਸਲਿੰਗ ਅਤੇ  ਇਸਦੇ ਕਲੀਨਿਕਲ ਅਤੇ ਡਾਇਗਨੌਸਟਿਕ ਪਹਿਲੂਆਂ ‘ਤੇ ਇੱਕ ਰੋਜ਼ਾ ਵਰਕਸ਼ਾਪ ਦਾ ਆਯੋਜਨ  ਕਰਵਾਇਆ ਗਿਆ। ਮੈਡਮ  ਦੀਪਤੀ ਚੌਧਰੀ, ਜੈਨੇਟਿਕ ਕਾਉਂਸਲਰ, ਲਾਈਫ ਸੈੱਲ ਇੰਟਰਨੈਸ਼ਨਲ ਲਿਮਟਿਡ, ਉੱਤਰੀ ਜ਼ੋਨ, ਭਾਰਤ ਨੇ ਇਸ ਵਰਕਸ਼ਾਪ ਵਿਚ ਬਤੌਰ ਸਰੋਤ ਬੁਲਾਰਾ ਸ਼ਿਰਕਤ ਕੀਤੀ । ਜੈਨੇਟਿਕ ਕਾਉਂਸਲਿੰਗ, ਮੌਜੂਦਾ ਯੁੱਗ ਵਿੱਚ ਇਸਦਾ ਮਹੱਤਵ, ਅਤੇ ਜੈਨੇਟਿਕ ਸਲਾਹਕਾਰਾਂ ਦੀਆਂ ਵਿਸ਼ਵਵਿਆਪੀ ਮੰਗਾਂ, ਜੈਨੇਟਿਕ ਕਾਉਂਸਲਿੰਗ ਦੀ ਲੋੜ, ਅਤੇ ਇਸ ਖੇਤਰ ਵਿੱਚ ਮੌਜੂਦਾ ਅਤੇ ਭਵਿੱਖ ਦੇ ਕਰੀਅਰ ਦੇ ਮੌਕੇ, ਅਤੇ ਵਿਗਿਆਨ ਦੇ ਵੱਖ-ਵੱਖ ਬਹੁ-ਅਨੁਸ਼ਾਸਨੀ ਖੇਤਰਾਂ ਬਾਰੇ ਬੌਧਿਕ ਹੁਨਰ ਅਤੇ ਗਿਆਨ ਵਿੱਚ ਸੁਧਾਰ ਕਰਨ ਦੇ ਮਕਸਦ ਨਾਲ ਆਯੋਜਿਤ ਹੋਈ ਇਸ ਵਰਕਸ਼ਾਪ ਵਿੱਚ 60 ਤੋਂ ਵੀ ਵੱਧ ਵਿਦਿਆਰਥਣਾਂ ਨੇ ਪੂਰੇ ਜੋਸ਼ ਅਤੇ ਉਤਸ਼ਾਹ ਨਾਲ ਹਿੱਸਾ ਲਿਆ।

ਵਿਦਿਆਰਥੀਆਂ ਨੂੰ ਸੰਬੋਧਿਤ ਹੁੰਦੇ ਹੋਏ ਮੈਡਮ ਦੀਪਤੀ ਚੌਧਰੀ ਨੇ ਮਨੁੱਖੀ ਸੈੱਲ, ਨਿਊਕਲੀਅਸ, ਕ੍ਰੋਮੋਸੋਮ ਅਤੇ ਡੀ.ਐਨ.ਏ. ਬਾਰੇ ਵਿਸਤਾਰ ਸਹਿਤ ਗੱਲ ਕਰਦਿਆਂ ਹੋਇਆਂ ਵੱਖ-ਵੱਖ ਭਾਰਤੀ ਭਾਈਚਾਰਿਆਂ ਵਿੱਚ ਜੈਨੇਟਿਕ ਵਿਕਾਰ, ਆਟੋਸੋਮਲ ਰੀਸੈਸਿਵ, ਆਟੋਸੋਮਲ ਪ੍ਰਭਾਵੀ ਵਿਕਾਰ, ਐਪੀਜੇਨੇਟਿਕ ਅਤੇ ਜੀਨ ਪੂਲ ਅਧਿਐਨਾਂ ਬਾਰੇ ਗੱਲ ਕਰਨ ਦੇ ਨਾਲ-ਨਾਲ ਵੱਖ-ਵੱਖ ਉਦਾਹਰਨਾਂ ਪੇਸ਼ ਕਰਕੇ ਵਿਦਿਆਰਥਣਾਂ ਨੂੰ ਸਮਝਾਇਆ। ਇਸ ਤੋਂ ਇਲਾਵਾ ਇਸ ਵਰਕਸ਼ਾਪ ਦੌਰਾਨ ਜੈਨੇਟਿਕ ਕਾਉਂਸਲਿੰਗ ਵਿੱਚ ਸ਼ਾਮਲ ਵੱਖ-ਵੱਖ ਮੈਡੀਕਲ-ਕਾਨੂੰਨੀ ਨੈਤਿਕਤਾਵਾਂ, ਇੱਕ ਜੈਨੇਟਿਕ ਕਾਉਂਸਲਰ ਦੀ ਭੂਮਿਕਾ, ਮਰੀਜ਼ਾਂ ਨਾਲ ਨਜਿੱਠਣਾ, ਅਤੇ ਮਹੱਤਵਪੂਰਨ ਤੌਰ ‘ਤੇ ਇਸ ਪੇਸ਼ੇ ਵਿੱਚ ਹਮਦਰਦੀ ਨਾਲ ਬਣੇ ਰਹਿਣ ਦੀ ਜ਼ਰੂਰਤ ਬਾਰੇ ਵੀ ਵਿਚਾਰ ਚਰਚਾ ਕੀਤੀ ਗਈ।ਵਰਕਸ਼ਾਪ ਦੇ ਅੰਤ ਵਿੱਚ ਜਿੱਥੇ ਸਰੋਤ ਬੁਲਾਰੇ ਦੁਆਰਾ ਵਿਦਿਆਰਥਣਾਂ ਦੇ ਵੱਖ-ਵੱਖ ਸਵਾਲਾਂ ਦੇ ਤਸੱਲੀਬਖਸ਼ ਜਵਾਬ ਦਿੱਤੇ ਗਏ ਉਥੇ ਨਾਲ ਹੀ  ਬਾਇਓਟੈਕਨਾਲੋਜੀ ਵਿਭਾਗ ਦੀਆਂ  ਤਿੰਨ ਵਿਦਿਆਰਥਣਾਂ ਨੇ ਰੋਲ-ਪਲੇ ਜਾਣਕਾਰੀ-ਮਨੋਰੰਜਨ ਗਤੀਵਿਧੀ ਦਾ ਪ੍ਰਦਰਸ਼ਨ ਕੀਤਾ ਜਿਸਦਾ ਉਦੇਸ਼ ਪੂਰੀ ਜੈਨੇਟਿਕ ਕਾਉਂਸਲਿੰਗ ਵਰਕਸ਼ਾਪ ਦੀ ਸਮੱਗਰੀ ਨੂੰ ਆਸਾਨੀ ਨਾ ਸਮਝਿਆ ਜਾ ਸਕੇ।

ਵਿਦਿਆਲਾ ਪ੍ਰਿੰਸੀਪਲ ਪ੍ਰੋ. ਅਤਿਮਾ ਸ਼ਰਮਾ ਦਿਵੇਦੀ ਸਰੋਤ ਬੁਲਾਰੇ ਦੁਆਰਾ ਵਿਦਿਆਰਥਣਾਂ ਨੂੰ ਪ੍ਰਦਾਨ ਕੀਤੀ ਗਈ ਮਹੱਤਵਪੂਰਨ ਜਾਣਕਾਰੀ ਦੇ ਲਈ ਧੰਨਵਾਦ ਵਿਅਕਤ ਕਰਦੇ ਹੋਏ ਬਾਇਓਟੈਕਨਾਲੋਜੀ ਵਿਭਾਗ ਦੁਆਰਾ ਇਸ ਸਫਲ ਆਯੋਜਨ ਲਈ ਕੀਤੇ ਗਏ ਉਪਰਾਲਿਆਂ ਦੀ ਵੀ ਸ਼ਲਾਘਾ ਕੀਤੀ ।