ਕੇਸਰੀ ਨਿਊਜ਼ ਨੈੱਟਵਰਕ: ਸਿੱਖੀ ਦੀਆਂ ਲਾਸਾਨੀ ਸ਼ਹਾਦਤਾਂ ਨੂੰ ਸਮਰਪਿਤ ਉੱਘੇ ਲੇਖਕ ਅਤੇ ਨਿਰਦੇਸ਼ਕ ਅਮਿੱਤ ਸ਼ਰਮਾ ਦੀ ਅਗਵਾਈ ‘ਚ ਧਾਰਮਿਕ ਨਾਟਕ ‘ਜੀਵਤ ਕਈ ਹਜ਼ਾਰ ਦਾ ਵਿਰਸਾ ਵਿਹਾਰ ਵਿਖੇ ਸਫਲ ਮੰਚਨ ਕੀਤਾ ਗਿਆ। ਨਾਟਕ ‘ਚ ਗੁਰੂ ਤੇਗ਼ ਬਹਾਦਰ ਸਾਹਿਬ ਦੇ ਸਮੇਂ ਤੋਂ ਲੈ ਕੇ ਸ੍ਰੀ ਗੁਰੂ ਗੋਬਿੰਦ ਸਿੰਘ ਜੀ ਵਲੋਂ ਖ਼ਾਲਸੇ ਦੀ ਸਿਰਜਣਾ ਅਤੇ ਸਾਹਿਬਜ਼ਾਦਿਆਂ ਦੀ ਲਾਸਾਨੀ ਸ਼ਹਾਦਤ ਤੱਕ ਦੇ ਸਮੇਂ ਨੂੰ ਬਹੁਤ ਹੀ ਭਾਵੁਕ ਤਰੀਕ ਨਾਲ ਪੇਸ਼ ਕੀਤਾ ਗਿਆ। ਅਜੋਕੇ ਸਮੇਂ ‘ਚ ਵੀ ਖ਼ਾਲਸੇ ਦੀ ਕਿੰਨੀ ਲੋੜ ਹੈ ਇਹ ਦਰਸਾਇਆ ਗਿਆ।

ਨਾਟਕ ‘ਚ ਦਿਖਾਇਆ ਗਿਆ ਕਿ ਕਿਵੇਂ ਬਿਪਤਾ ਭਰੇ ਵੱਖ ਵੱਖ ਸਮਿਆਂ ‘ਚ ਸਿੱਖਾਂ ਨੇ ਆਪਣੀਆਂ ਜਾਨਾਂ ਵਾਰ ਕੇ ਮਨੁੱਖਤਾ ਨੂੰ ਬਚਾਇਆ। ਕੋਵਿਡ ਕਾਲ ਦੌਰਾਨ ਵੀ ਜਦੋਂ ਲੋਕ ਆਕਸੀਜਨ ਦੀ ਥੁੜ ਨਾਲ ਮਰ ਰਹੇ ਸਨ, ਉਸ ਸਮੇਂ ਵੀ ਸਿੱਖਾਂ ਨੇ ਆਪਣੀ ਜਾਨ ਦੀ ਪ੍ਰਵਾਹ ਨਾ ਕਰਦੇ ਹੋਏ ਆਮ ਲੋਕਾਂ ਨੂੰ ਆਕਸੀਜਨ ਮੁਹੱਈਆ ਕਰਵਾਈ। ਨਾਟਕ ‘ਚ ਸੁਰਿੰਦਰਪਾਲ ਸਿੰਘ, ਸੰਨੀ ਅੱਕੀ, ਦੀਕਸ਼ਾਂ, ਰਜਿੰਦਰ, ਈਸ਼ੂ ਨੇ ਵਿਸ਼ੇਸ਼ ਭੂਮਿਕਾ ਨਿਭਾਈ, ਨਾਟਕ ਦਾ ਸੰਗੀਤ ਦਿਪਾਸੂ ਵਲੋਂ ਦਿੱਤਾ ਗਿਆ ਅਤੇ ਲਾਈਟ ਗੁਰਵਿੰਦਰ ਸਿੰਘ ਵਲੋਂ ਕੀਤੀ ਗਈ। ਸਮਾਗਮ ਦੇ ਅੰਤ ‘ਚ ‘ ਵਿਰਸਾ ਵਿਹਾਰ ਦੇ ਸਕੱਤਰ ਗੁਰਮੀਤ ਸਿੰਘ ਨੇ ਸਮੂਹ ਹਾਜ਼ਰੀਨ ਦਾ ਧੰਨਵਾਦ ਕਰਦੇ ਹੋਏ ਕਿਹਾ ਕਿ ਉਹ ਭਵਿੱਖ ਵਿਚ ਵੀ ਅਜਿਹੇ ਉਪਰਾਲੇ ਕਰਦੇ ਰਹਿਣਗੇ।

ਸਮਾਗਮ ਦੌਰਾਨ ਆਪ ਆਗੂ ਦੀਪਕ ਬਾਲੀ ਨੇ ਮੁੱਖ ਮਹਿਮਾਨ ਅਤੇ ਓਲੰਪੀਅਨ ਸੁਰਿੰਦਰ ਸਿੰਘ ਸੋਢੀ ਨੇ ਵਿਸ਼ੇਸ਼ ਮਹਿਮਾਨ ਵਜੋਂ ਸ਼ਿਰਕਤ ਕੀਤੀ। ਇਸ ਮੌਕੇ ਇੰਜੀਨੀਅਰ ਐੱਸ.ਐੱਸ.ਅਜੀਮਲ, ਨਿਤਿਨ ਕਪੂਰ, ਫੈਡਰੇਸ਼ਨ ਆਗੂ ਪਰਮਿੰਦਰ ਸਿੰਘ ਢੀਂਗਰਾ, ਆਤਮ ਪ੍ਰਕਾਸ਼ ਸਿੰਘ, ਉੱਘੇ ਲੋਕ ਗਾਇਕ ਦਲਵਿੰਦਰ ਦਿਆਲਪੁਰੀ, ਤਜਿੰਦਰ ਸਿੰਘ ਪਰਦੇਸੀ, ਹਰਪੀਤ ਸਿੰਘ ਨੀਟੂ, ਰਮੇਸ਼ ਮੋਦਗਿਲ, ਵਿਜੇ ਗੁਪਤਾ, ਮਹਾਵੀਰ ਸਿੰਘ, ਸੁਰਜੀਤ ਲਾਲ ਸਹੋਤਾ,ਪ੍ਰਵੀਨ ਅਬਰੋਲ, ਸੁਖਬੀਰ ਕੌਰ ਚੱਠਾ ਤਜਿੰਦਰ ਕੌਰ ਥਿੰਦ, ਰਮਨਪ੍ਰੀਤ ਕੌਰ, ਰੇਖਾ ਕਸ਼ਯਪ ਤੋਂ ਇਲਾਵਾ ਵੱਡੀ ਗਿਣਤੀ ‘ਚ ਕਲਾ ਪ੍ਰੇਮੀਆਂ ਨੇ ਨਾਟਕ ਦਾ ਅਨੰਦ ਮਾਣਿਆ।