ਜਲੰਧਰ (ਕੇਸਰੀ ਨਿਊਜ਼ ਨੈੱਟਵਰਕ) –

ਭਗਤੀ ਲਹਿਰ ਦੇ ਆਦਿ ਮਹਾਂਪੁਰਖਾਂ ਦੇ ਆਸ਼ੀਰਵਾਦ ਨਾਲ 4 ਨਵੰਬਰ ਤੋਂ ਮੀਰਾ ਬਾਈ ਦੇ ਜਨਮ ਸਥਾਨ ਮੇੜਤਾ ਤੋਂ ਸ਼ੁਰੂ ਹੋਈ ” ਮੀਰਾ ਚੱਲੀ ਸਤਿਗੁਰੂ ਕੇ ਧਾਮ ਸਾਂਝੀਵਾਲਤਾ ਯਾਤਰਾ -2022″, ਜੋ 8 ਨਵੰਬਰ ਨੂੰ ਗੁਰੂ ਨਾਨਕ ਦੇਵ ਜੀ ਦੇ ਪ੍ਰਕਾਸ਼ ਪੁਰਬ ਮੌਕੇ ਪੰਜਾਬ ਵਿੱਚ ਦਾਖਲ ਹੋਈ ਦਾ ਹਰ ਜਿਲੇ ਵਿੱਚ ਭਰਵਾਂ ਸਵਾਗਤ ਕੀਤਾ ਜਾ ਰਿਹਾ ਹੈ। ਬੀਤੀ ਸ਼ਾਮ ਮੌੜ ਮੰਡੀ ਰਾਹੀਂ ਭੀਖੀ ਪੁੱਜਣ ਤੇ ਯਾਤਰਾ ਦਾ ਹਾਰਦਿਕ ਸੁਆਗਤ ਕੀਤਾ ਗਿਆ। ਇਹ ਯਾਤਰਾ ਫਾਜ਼ਿਲਕਾ, ਫਿਰੋਜ਼ਪੁਰ, ਅੰਮਿ੍ਤਸਰ, ਧਾਰੀਵਾਲ,ਪਠਾਨਕੋਟ, ਸ਼ਾਹਪੁਰ ਕੰਢੀ, ਟਾਂਡਾ, ਜਗਤ ਗੁਰੂ ਬਾਬਾ ਨਾਨਕ ਜੀ ਦੀ ਕਰਮ ਭੂਮੀ ਸੁਲਤਾਨਪੁਰ ਲੋਧੀ, ਜਲੰਧਰ,ਫਗਵਾੜਾ, , ਨਗਰ,ਲੁਧਿਆਣਾ, ਜਗਰਾਓਂ, ਰਾਮਪੁਰਾ ਫੂਲ ਰਾਹੀਂ ਹੁੰਦੇ ਹੋਏ 20 ਨਵੰਬਰ ਨੂੰ ਭੀਖੀ ਪੁੱਜੀ।

ਇਹ ਜਾਣਕਾਰੀ ਦਿੰਦੇ ਹੋਏ ਸਾਂਝੀਵਾਲਤਾ ਯਾਤਰਾ ਦੇ ਇੰਚਾਰਜ ਜਸਪਾਲ ਸਿੰਘ ਖੀਵਾ ਅਤੇ ਸਹਿ ਇੰਚਾਰਜ ਨਰੇਸ਼ ਕੁਮਾਰ ਆਨੰਦਪੁਰ ਸਾਹਿਬ ਨੇ ਦੱਸਿਆ ਕਿ ਸੰਤ ਸ਼ਿਰੋਮਣੀ ਮੀਰਾ ਬਾਈ ਇਸ ਭਗਤੀ ਲਹਿਰ ਦੀ ਨਾਇਕਾ ਰਹੀ ਹੈ, ਜਿਸ ਨੇ ਸਤੀ ਅਤੇ ਜਾਤ ਦੇ ਵਿਤਕਰੇ ਨੂੰ ਤੋੜ ਕੇ ਸਮਾਜ ਨੂੰ ਨਵਾਂ ਰਸਤਾ ਦਿਖਾਇਆ ਹੈ। ਉਨ੍ਹਾਂ ਦੇ ਜਨਮ ਸਥਾਨ ਮੇੜਤਾ ਰਾਜਸਥਾਨ ਤੋਂ 4 ਨਵੰਬਰ ਨੂੰ ਚੱਲੀ ਯਾਤਰਾ 8 ਨਵੰਬਰ ਨੂੰ ਰਾਜਸਥਾਨ ਦੇ ਗੰਗਾਨਗਰ ਤੋਂ ਜੰਡਵਾਲਾ, ਚੂੜੀਵਾਲਾ ਰਾਹੀਂ ਹੁੰਦੀ ਹੋਈ ਫਾਜ਼ਿਲਕਾ ਰਾਹੀਂ ਪੰਜਾਬ ਵਿੱਚ ਦਾਖਲ ਹੋਈ।

ਮਹੰਤ ਪੁਰਸ਼ੋਤਮ ਲਾਲ ਜੀ ਚੱਕ ਹਕੀਮ ਫਗਵਾੜਾ, ਮਹੰਤ ਗੁਰਵਿੰਦਰ ਸਿੰਘ ਜੀ ਨਿਰਮਲ ਕੁਟੀਆ ਹਜ਼ਾਰਾ, ਸੰਤ ਹਰੀ ਨਰਾਇਣ ਜੀ ਹਰਿਦੁਆਰ, ਸੰਤ ਦਯਾਨੰਦ ਜੀ ਲੁਧਿਆਣਾ, ਮਹੰਤ ਸੰਗਤ ਨਾਥ ਜੀ ਅਤੇ ਹੋਰ ਸੰਤ ਮੰਡਲੀ ਵਲੋਂ ਇਸ ਸੰਦੇਸ਼ ਨੂੰ ਘਰ-ਘਰ ਲੈ ਜਾਣ ਲਈ “ਮੀਰਾ ਚੱਲੀ ਸਤਿਗੁਰੂ ਕੇ ਧਾਮ ਸਾਂਝੀਵਾਲਤਾ ਯਾਤਰਾ 2022” ਦੌਰਾਨ ਥਾਂ ਥਾਂ ਸੰਗਤਾਂ ਨੂੰ ਇੱਕਜੁੱਟਤਾ ਦਾ ਸੰਦੇਸ਼ ਦਿੱਤਾ ਜਾ ਰਿਹਾ ਹੈ। ਪੰਜਾਬ ਦੇ ਵੱਖ ਵੱਖ ਜਿਲਿਆਂ ਰਾਹੀਂ ਇਹ ਯਾਤਰਾ, ਜੰਮੂ ਅਤੇ ਕਸ਼ਮੀਰ, ਹਿਮਾਚਲ ਸੂਬੇ ਵਿੱਚ ਹੁੰਦੇ ਹੋਏ 4 ਦਸੰਬਰ 2022 ਨੂੰ ਗੋਪਾਲ ਮੋਚਨ (ਯਮੁਨਾਨਗਰ) ਹਰਿਆਣਾ ਵਿਖੇ ਸੰਪੂਰਣ ਹੋਵੇਗੀ। ਭੀਖੀ ਦੇ ਪ੍ਰਾਚੀਨ ਸ਼ਿਵ ਮੰਦਰ ਵਿਖੇ ਪੁੱਜਣ ਤੇ ਜਤਿੰਦਰ ਸ਼ਰਮਾਂ, ਦਿਨੇਸ਼ ਕੁਮਾਰ, ਦਵਿੰਦਰ ਸੋਨੀ, ਰਾਜ ਸਿੰਘ, ਅਜੇ ਸਿੰਘ, ਆਦਿ ਦੀ ਅਗਵਾਈ ਹੇਠ ਭੀਖੀ ਅਤੇ ਆਸਪਾਸ ਦੇ ਪਿੰਡਾਂ ਤੋਂ ਹੁੰਮ ਹੁਮਾ ਕੇ ਪੁੱਜੀ ਸੰਗਤ ਨੇ ਯਾਤਰਾ ਦਾ ਹਾਰਦਿਕ ਸੁਆਗਤ ਕੀਤਾ। ਸੰਗਤਾਂ ਵਲੋਂ ਯਾਤਰਾ ਨਾਲ ਚਲ ਰਹੇ ਸੰਤਾਂ ਮਹੰਤਾਂ ਅਤੇ ਸੰਗਤਾਂ ਦੇ ਰਾਤਰੀ ਵਿਸਰਾਮ ਅਤੇ ਭੋਜਨ ਦਾ ਢੁੱਕਵਾਂ ਪ੍ਬੰਧ ਕੀਤਾ ਗਿਆ ਸੀ। 21 ਨਵੰਬਰ ਨੂੰ ਇਹ ਯਾਤਰਾ ਸੰਗਰੂਰ, 22 ਨੂੰ ਰਾਜਪੁਰਾ, 23 ਨੂੰ ਅਗੰਮ ਪੁਰ ਆਨੰਦਪੁਰ ਸਾਹਿਬ ਅਤੇ 24 ਨੂੰ ਚੰਡੀਗੜ੍ਹ ਵਿਖੇ ਪੁੱਜੇਗੀ। 27 ਨਵੰਬਰ ਤੋਂ ਇਹ ਯਾਤਰਾ ਹਰਿਆਣਾ ਵਿੱਚ ਪਰਵੇਸ਼ ਕਰ ਜਾਵੇਗੀ।