ਜਲੰਧਰ, (ਕੇਸਰੀ ਨਿਊਜ਼ ਨੈੱਟਵਰਕ) : ਡੀਏਵੀ ਯੂਨੀਵਰਸਿਟੀ ਦੇ ਤਿੰਨ ਖੋਜਕਰਤਾਵਾਂ ਡਾ. ਮਾਨਿਕ ਸ਼ਰਮਾ, ਡਾ. ਕੇਸ਼ਵ ਵਾਲੀਆ ਤੇ ਡਾ. ਰਾਜੇਸ਼ ਜੋਸ਼ੀ ਨੇ ਦੁਨੀਆ ਦੇ ਟਾਪ ਦੇ ਦੋ ਫ਼ੀਸਦ ਵਿਗਿਆਨੀਆਂ ਦੀ ਸੂਚੀ ‘ਚ ਜਗ੍ਹਾ ਬਣਾਈ ਹੈ। ਇਹ ਸੂਚੀ ਸਟੈਨਫੋਰਡ ਯੂਨੀਵਰਸਿਟੀ, ਅਮਰੀਕਾ ਵੱਲੋਂ ਪ੍ਰਕਾਸ਼ਿਤ ਕੀਤੀ ਗਈ ਹੈ। ਦੋ ਫ਼ੀਸਦ ਵਿਗਿਆਨੀਆਂ ਦੇ ਨਾਂ ਪਬਲੀਕੇਸ਼ਨਜ਼, ਜਰਨਲ ਇੰਪੈਕਟ, ਸਾਈਟੇਸ਼ਨ ਤੇ ਉਨ੍ਹਾਂ ਦੇ ਸਕੋਪਸ ਪ੍ਰੋਫਾਈਲ ਦੇ ਆਧਾਰ ‘ਤੇ ਚੁਣੇ ਗਏ ਹਨ।

ਮਸ਼ੀਨ ਲਰਨਿੰਗ ‘ਤੇ ਵਿਸ਼ੇਸ਼ ਕੋਜ ਕਰ ਰਹੇ ਡਾ. ਮਾਣਿਕ

ਡੀਏਵੀ ਯੂਨੀਵਰਸਿਟੀ ਦੇ ਕੰਪਿਊਟਰ ਸਾਇੰਸ ਤੇ ਟੈਕਨਾਲੋਜੀ ਦੇ ਡੀਨ ਡਾ. ਮਾਨਿਕ ਸ਼ਰਮਾ ਕੋਲ ਅਧਿਆਪਨ ਤੇ ਖੋਜ ਦਾ 15 ਸਾਲਾਂ ਤੋਂ ਵੱਧ ਦਾ ਤਜਰਬਾ ਹੈ। ਉਨ੍ਹਾਂ ਦੀ ਖੋਜ ਵਿੱਚ ਮਸ਼ੀਨ ਲਰਨਿੰਗ, ਆਪਟੀਮਾਈਜੇਸ਼ਨ ਤਕਨੀਕ, ਹੈਲਥ ਇਨਫਰਮੇਸ਼ਨ ਸਾਇੰਸ ਤੇ ਸਮਾਰਟ ਸਿਸਟਮ ਸ਼ਾਮਲ ਹਨ। ਉਹ ਵਿਹਾਰਕ ਤੇ ਮਾਨਸਿਕ ਸਮੱਸਿਆਵਾਂ ਦੇ ਨਿਦਾਨ ਤੇ ਇਲਾਜ ਲਈ ਇਕ ਸਮਾਰਟ ਪ੍ਰਣਾਲੀ ਵਿਕਸਿਤ ਕਰਨ ‘ਤੇ ਕੰਮ ਕਰ ਰਹੇ ਹਨ। ਉਹ ਤਕਨੀਕ ਜ਼ਰੀਏ ਮਨੁੱਖਤਾ ਨੂੰ ਸਮਰਪਿਤ ਵਿਸ਼ਵ ਦੇ ਸਭ ਤੋਂ ਵੱਡੇ ਤਕਨੀਕੀ ਪੇਸ਼ਵਰ ਸੰਗਠਨ ਆਈ.ਈ.ਈ.ਈ. ਦੇ ਸੀਨੀਅਰ ਮੈਂਬਰ ਵੀ ਹਨ।

ਪਲਾਜ਼ਮਾ ਫਿਜ਼ਿਕਸ ‘ਚ ਰਿਸਰਚ ਕਰ ਰਹੇ ਡਾ. ਵਾਲੀਆ

ਭੌਤਿਕ ਵਿਗਿਆਨ ਦੇ ਐਸੋਸੀਏਟ ਪ੍ਰੋਫੈਸਰ ਤੇ ਵਿਭਾਗ ਦੇ ਕੋਆਰਡੀਨੇਟਰ ਡਾ.ਕੇਸ਼ਵ ਵਾਲੀਆ ਪਲਾਜ਼ਮਾ ਫਿਜ਼ਿਕਸ ‘ਚ ਖੋਜ ਕਰ ਰਹੇ ਹਨ। ਉਨ੍ਹਾਂ ਦੀ ਖੋਜ ਵਿੱਚ ਲੇਜ਼ਰ ਪਲਾਜ਼ਮਾ ਇੰਟਰੈਕਸ਼ਨ, ਪਲਾਜ਼ਮਾ ‘ਚ ਨਾਨ-ਲੀਨੀਅਰ ਵੇਬਜ਼ ਤੇ ਪਾਰਟੀਕਲਜ਼ ਦੀ ਐਕਸਲੇਰੇਸ਼ਨ ਸ਼ਾਮਲ ਹਨ। ਉਨ੍ਹਾਂ ਦੀ ਖੋਜ ਦਾ ਉਦੇਸ਼ ਲੇਜ਼ਰ ਸੰਚਾਲਿਤ ਅਸਥਿਰਤਾ ਦੀ ਤਕਨੀਕ ਦੀ ਵਰਤੋਂ ਕਰਦੇ ਹੋਏ ਊਰਜਾ ਦੇ ਇੱਕ ਬਦਲਵੇਂ ਸਰੋਤ ਨੂੰ ਵਿਕਸਿਤ ਕਰਨਾ ਹੈ।

ਇਨਫਰਮੇਸ਼ਨ ਥਿਊਰੀ ‘ਤੇ ਖੋਜ ਕਰ ਰਹੇ ਡਾ. ਜੋਸ਼ੀ

ਡਾ. ਰਾਜੇਸ਼ ਜੋਸ਼ੀ ਗਣਿਤ ਵਿਭਾਗ ‘ਚ ਸਹਾਇਕ ਪ੍ਰੋਫੈਸਰ ਹਨ। ਉਹ ਇਨਫਰਮੇਸ਼ਨ ਥਿਊਰੀ ‘ਤੇ ਖੋਜ ਕਰ ਰਹੇ ਹਨ। ਉਨ੍ਹਾਂ ਨੇ ਅੰਤਰਰਾਸ਼ਟਰੀ ਪ੍ਰਸਿੱਧੀ ਵਾਲੇ ਰਸਾਲਿਆਂ ‘ਚ ਕਈ ਖੋਜ ਪੱਤਰ ਪ੍ਰਕਾਸ਼ਿਤ ਕੀਤੇ ਹਨ। ਉਨ੍ਹਾਂ ਦੇ ਖੋਜ ਖੇਤਰਾਂ ‘ਚ ਕੋਡਿੰਗ ਥਿਊਰੀ, ਡਾਈਵਰਜ਼ਨਸ, ਡਿਸਸਿਮੀਲੈਰਿਟੀਜ਼ ਤੇ ਫਜ਼ੀ ਸੈੱਟ ਥਿਊਰੀ ਸ਼ਾਮਲ ਹਨ। ਵਾਈਸ ਚਾਂਸਲਰ ਡਾ. ਮਨੋਜ ਕੁਮਾਰ, ਰਜਿਸਟਰਾਰ ਕੇਐਨ ਕੌਲ ਤੇ ਡੀਨ ਆਫ਼ ਸਾਇੰਸ ਡਾ. ਆਰਕੇ ਸੇਠ ਤਿੰਨਾਂ ਨੇ ਵੀ ਇਸ ਪ੍ਰਾਪਤੀ ਲਈ ਖੋਜਾਰਥੀਆਂ ਦੀ ਸ਼ਲਾਘਾ ਕੀਤੀ |