ਕੇਸਰੀ ਨਿਊ਼ਜ਼ ਨੈੱਟਵਰਕ- ਗਰਭਪਾਤ ਦੇ ਹੱਕ ਬਾਰੇ ਔਰਤ ਨੂੰ ਮਿਲੇ ਅਧਿਕਾਰਾਂ ਦੀ ਚਰਚਾ ਦੌਰਾਨ ਇਕ ਮਾਂ ਨੂੰ ਆਪਣੇ ਗਰਭ ਵਿਚ ਪਲ ਰਹੇ ਬੱਚੇ ਦੀ ਹੱਤਿਆ ਲਈ ਜਿੰਮੇਵਾਰ ਮੰਨਦੇ ਹੋਏ ਇਕ ਅਦਾਲਤ ਨੇ ਮੰਦਭਾਗੀ ਮਾਂ ਨੂੰ 50 ਸਾਲ ਕੈਦ ਦੀ ਸਜ਼ਾ ਸੁਣਾਈ ਹੈ। ਇਸ ਮਾਮਲੇ ਦੀ ਹਰ ਜ਼ੁਬਾਨ ਉੱਪਰ ਚਰਚਾ ਚਲ ਰਹੀ ਹੈ।

ਅਸੀਂ ਸਾਰੇ ਜਾਣਦੇ ਹਾਂ ਕਿ ਬੱਚਾ ਕਿਸੇ ਵੀ ਮਾਂ ਲਈ ਬਹੁਤ ਮਹੱਤਵਪੂਰਨ ਹੁੰਦਾ ਹੈ ਅਤੇ ਮਾਂ ਆਪਣੇ ਬੱਚੇ ਦੀ ਦੇਖਭਾਲ ਲਈ ਕਿਸੇ ਵੀ ਹੱਦ ਤੱਕ ਜਾ ਸਕਦੀ ਹੈ। ਆਪਣੇ ਬੱਚੇ ਨੂੰ ਗੁਆਉਣ ਦਾ ਦੁੱਖ ਇੱਕ ਮਾਂ ਲਈ ਪਹਾੜ ਜਿੱਡਾ ਦੁੱਖ ਹੁੰਦਾ ਹੈ। ਜੇ ਕੋਈ ਜਾਣ-ਬੁੱਝ ਕੇ ਕਿਸੇ ਬੱਚੇ ਨੂੰ ਮਾਰ ਦੇਵੇ ਤਾਂ ਉਸ ਨੂੰ ਅਪਰਾਧ ਦੀ ਸਜ਼ਾ ਦਿੱਤੀ ਜਾ ਸਕਦੀ ਹੈ। ਪਰ ਜੇਕਰ ਕਿਸੇ ਦਾ ਬੱਚਾ ਦੁਰਘਟਨਾ ਵਿੱਚ ਚਲਾ ਗਿਆ ਹੋਵੇ ਅਤੇ ਉਸ ਮਾਂ ਨੂੰ ਸਜ਼ਾ ਮਿਲ ਜਾਵੇ ਤਾਂ ਇਹ ਗੱਲ ਖ਼ਬਰ ਬਣਨਾ ਸੁਭਾਵਿਕ ਹੈ।

ਅਜਿਹਾ ਹੀ ਕੁਝ ਅਲ ਸਲਵਾਡੋਰ ਦੀ ਰਹਿਣ ਵਾਲੀ ਇਕ ਔਰਤ ਨਾਲ ਹੋਇਆ। ਔਰਤ ਨੇ ਆਪਣੇ ਅਣਜੰਮੇ ਬੱਚੇ ਨੂੰ ਗੁਆ ਦਿੱਤਾ। ਜਾਣਕਾਰੀ ਮੁਤਾਬਕ ਉਸ ਦਾ ਬੱਚਾ ਟਾਇਲਟ ‘ਚ ਹੀ ਗਰਭ ‘ਚੋਂ ਬਾਹਰ ਆ ਗਿਆ ਅਤੇ ਤਿਲਕ ਕੇ ਪੈਨ ‘ਚ ਡਿੱਗ ਗਿਆ। ਡਿੱਗਣ ਕਾਰਨ ਬੱਚੇ ਨੂੰ ਸੱਟਾਂ ਲੱਗੀਆਂ, ਜਿਸ ਕਾਰਨ ਉਸ ਦੀ ਮੌਤ ਹੋ ਗਈ। ਔਰਤ ਨੂੰ ਤੁਰੰਤ ਹਸਪਤਾਲ ‘ਚ ਭਰਤੀ ਕਰਵਾਇਆ ਗਿਆ। ਅਜੇ ਇਹ ਔਰਤ ਆਪਣੇ ਬੱਚੇ ਦੀ ਮੌਤ ਦਾ ਸੰਤਾਪ ਭੋਗ ਰਹੀ ਸੀ ਕਿ ਅਦਾਲਤ ਤੋਂ ਉਸ ਨੂੰ ਗ੍ਰਿਫਤਾਰ ਕਰਨ ਦਾ ਹੁਕਮ ਆ ਗਿਆ। ਉਸ ‘ਤੇ ਆਪਣੇ ਬੱਚੇ ਦੀ ਹੱਤਿਆ ਦਾ ਦੋਸ਼ ਸੀ।

ਟਾਇਲਟ ਵਿੱਚ ਗਰਭਪਾਤ ਦਾ ਸ਼ਿਕਾਰ ਹੋਈ ਲੈਸਲੀ ਨੂੰ ਸਖ਼ਤ ਸਜ਼ਾ ਦਿੱਤੀ ਗਈ ਹੈ। ਮੱਧ ਅਮਰੀਕਾ ਦੇ ਗਰਭਪਾਤ ਕਾਨੂੰਨ ਅਨੁਸਾਰ ਉਸ ਨੂੰ ਪੰਜਾਹ ਸਾਲ ਦੀ ਕੈਦ ਦੀ ਸਜ਼ਾ ਸੁਣਾਈ ਗਈ ਹੈ। ਅਦਾਲਤ ਮੁਤਾਬਕ ਲੈਸਲੀ ਨੇ ਆਪਣੇ ਅਣਜੰਮੇ ਬੱਚੇ ਦੀ ਜਾਨ ਲੈ ਲਈ ਹੈ। ਬੱਚੇ ਦੀ ਗਰਦਨ ‘ਤੇ 6 ਨਿਸ਼ਾਨ ਸਨ। ਲੈਸਲੀ ਮੁਤਾਬਕ 17 ਜੂਨ ਨੂੰ ਟਾਇਲਟ ਕਰਦੇ ਸਮੇਂ ਉਸ ਦਾ ਬੱਚਾ ਗਰਭ ‘ਚੋਂ ਬਾਹਰ ਆ ਗਿਆ। ਲੇਸਲੀ ਨੂੰ ਪਤਾ ਨਹੀਂ ਲੱਗਾ ਅਤੇ ਬੱਚਾ ਪੈਨ ‘ਚ ਡਿੱਗ ਗਿਆ। ਇਸ ਕਾਰਨ ਬੱਚੇ ਦੀ ਗਰਦਨ ‘ਤੇ ਸੱਟ ਲੱਗ ਗਈ ਅਤੇ ਉਸ ਦੀ ਮੌਤ ਹੋ ਗਈ। ਇਸ ਜੁਰਮ ਲਈ ਲੈਸਲੀ ਨੂੰ ਪੰਜਾਹ ਸਾਲ ਦੀ ਸਜ਼ਾ ਸੁਣਾਈ ਗਈ ਹੈ।