ਕੇਸਰੀ ਨਿਊਜ਼ ਨੈੱਟਵਰਕ- ਰਾਜਸਥਾਨ ਦੇ ਸ਼ਹਿਰ ਉਦੈਪੁਰ ਵਿਚ ਟੇਲਰ ਕਨ੍ਹਈਆ ਲਾਲ ਦੀ ਹੱਤਿਆ ਕਰਨ ਤੋਂ ਬਾਅਦ ਦੋਵੇਂ ਦੋਸ਼ੀ – ਮੁਹੰਮਦ ਰਿਆਜ਼ ਅਖਤਾਰੀ ਅਤੇ ਗ਼ੌਸ ਮੁਹੰਮਦ ਰਾਜਸਮੰਦ ਦੇ ਭੀਮ ਖੇਤਰ ‘ਚ ਗ੍ਰਿਫਤਾਰ ਕਰ ਲਏ ਗਏ। ਨਿਊਜ਼ 18 ਨੈੱਟਵਰਕ ਦੀ ਰਿਪੋਰਟ ਅਨੁਸਾਰ ਮੰਗਲਵਾਰ ਨੂੰ ਦੋਹਾਂ ਦੋਸ਼ੀਆਂ ਨੇ ਉਦੈਪੁਰ ‘ਚ ਕਨ੍ਹਈਆ ਲਾਲ ਟੇਲਰ ਮਾਸਟਰ ਦਾ ਤੇਜ਼ਧਾਰ ਹਥਿਆਰਾਂ ਨਾਲ ਕਤਲ ਕਰ ਦਿੱਤਾ ਸੀ ਅਤੇ ਉਸ ਦੀ ਵੀਡੀਓ ਜਨਤਕ ਕਰਦਿਆਂ ਕਿਹਾ ਸੀ ਕਿ ਉਹ ‘ਇਸਲਾਮ ਦੇ ਅਪਮਾਨ’ ਦਾ ਬਦਲਾ ਲੈ ਰਹੇ ਹਨ।

ਸੂਤਰਾਂ ਅਨੁਸਾਰ ਮੁਹੰਮਦ ਉਦੈਪੁਰ ਦੇ ਰਿਆਸਤ ਹੁਸੈਨ ਅਤੇ ਅਬਦੁਲ ਰਜ਼ਾਕ ਦੇ ਜ਼ਰੀਏ ਪਾਕਿਸਤਾਨ ਸਥਿਤ ਕੱਟੜਪੰਥੀ ਧਾਰਮਿਕ ਸਮੂਹ ਦਾਵਤ-ਏ-ਇਸਲਾਮੀ ਵਿਚ ਸ਼ਾਮਲ ਹੋਇਆ ਸੀ ਅਤੇ 2013 ਦੇ ਅੰਤ ਤੱਕ ਭਾਰਤ ਦੇ 30 ਹੋਰ ਲੋਕਾਂ ਨਾਲ ਪਾਕਿਸਤਾਨ ਦੇ ਕਰਾਚੀ ਗਿਆ ਸੀ। ਉਸ ਦੇ ਨਾਲ ਉਦੈਪੁਰ ਦੇ ਦੋ ਹੋਰ ਲੋਕ ਵਸੀਮ ਅਖਤਾਰੀ ਅਤੇ ਅਖਤਰ ਰਜ਼ਾ ਵੀ ਸਨ। ਉਹ 45 ਦਿਨਾਂ ਬਾਅਦ 1 ਫਰਵਰੀ 2014 ਨੂੰ ਭਾਰਤ ਪਰਤਿਆ।

‘ਜ਼ੋਰਦਾਰ ਜਵਾਬ ਦੇਣ ਲਈ ਕਿਹਾ’

ਭਾਰਤੀ ਜਨਤਾ ਪਾਰਟੀ (ਭਾਜਪਾ) ਦੀ ਸਾਬਕਾ ਨੇਤਾ ਨੂਪੁਰ ਸ਼ਰਮਾ ਵੱਲੋਂ ਪੈਗੰਬਰ ਮੁਹੰਮਦ ਵਿਰੁੱਧ ਟਿੱਪਣੀਆਂ ਤੋਂ ਬਾਅਦ, ਸਲਮਾਨ ਭਾਈ ਅਤੇ ਅੱਬੂ ਇਬਰਾਹਿਮ ਨੇ ਮੁਹੰਮਦ ਨੂੰ ਕਿਹਾ ਕਿ ਉਨ੍ਹਾਂ ਨੇ ਪਾਕਿਸਤਾਨ ਵਿੱਚ ਵਿਰੋਧ ਕੀਤਾ ਸੀ ਅਤੇ ਉਨ੍ਹਾਂ ਨੂੰ ਵੀ ਭਾਰਤ ਵਿੱਚ “ਸਖਤ ਪ੍ਰਤੀਕਿਰਿਆ” ਦਿਖਾਉਣੀ ਚਾਹੀਦੀ ਹੈ। 20 ਜੂਨ ਨੂੰ ਅਖਤਾਰੀ ਅਤੇ ਮੁਹੰਮਦ ਨੇ ਉਦੈਪੁਰ ਦੇ ਮੁਖਰਜੀ ਚੌਕ ਨੇੜੇ ਅੰਜੁਮਨ ਵਿਖੇ ਮੁਜੀਬ ਸਿੱਦੀਕੀ (ਅੰਜੁਮਨ ਸਦਰ), ਜੁਲਕਾਨ ਸਦਰ (ਮੌਲਾਨਾ), ਅਸਵਾਕ (ਵਕੀਲ) ਅਤੇ ਮਨੂਦ (ਵਕੀਲ) ਨਾਲ ਮੀਟਿੰਗ ਕੀਤੀ, ਜਿੱਥੇ ਦੋਵਾਂ ਨੇ ਸਹਿਮਤੀ ਨਾਲ ਕਤਲ ਕਰਨ ਲਈ ਕਿਹਾ।

‘ਮਿਸਾਲ ਕਾਇਮ ਕਰਨ ਲਈ ਕੰਮ ਕਰੇਗਾ’

ਰਿਆਜ਼ ਨੇ ਕਨ੍ਹਈਆ ਲਾਲ ਦੀ ਦੁਕਾਨ ਦਾ ਚਾਰ-ਪੰਜ ਵਾਰ ਸਰਵੇਖਣ ਕੀਤਾ। ਸੂਤਰਾਂ ਨੇ ਕਿਹਾ ਕਿ ਮੁਹੰਮਦ ਨੇ ਫਿਰ ਸਲਮਾਨ ਭਾਈ ਅਤੇ ਅੱਬੂ ਇਬਰਾਹਿਮ ਨਾਲ ਸੰਪਰਕ ਕੀਤਾ ਅਤੇ ਉਨ੍ਹਾਂ ਨੂੰ ਕਿਹਾ ਕਿ ਉਹ “ਕੁਝ ਮਿਸਾਲ ਕਾਇਮ ਕਰਨ ਵਾਲਾ ਕੰਮ” ਕਰੇਗਾ ਅਤੇ ਉਨ੍ਹਾਂ ਨੂੰ ਵੀਡੀਓ ਭੇਜੇਗਾ। ਉਦੈਪੁਰ ਸ਼ਹਿਰ ‘ਚ ਮੰਗਲਵਾਰ ਨੂੰ ਉਸ ਸਮੇਂ ਤਣਾਅ ਪੈਦਾ ਹੋ ਗਿਆ ਜਦੋਂ ਰਿਆਜ਼ ਅਖਤਾਰੀ ਨੇ ਤੇਜ਼ਧਾਰ ਹਥਿਆਰ ਨਾਲ ਦਰਜ਼ੀ ਦਾ ਗਲਾ ਵੱਢ ਦਿੱਤਾ ਅਤੇ ਇਕ ਹੋਰ ਵਿਅਕਤੀ, ਗੌਸ ਮੁਹੰਮਦ, ਨੇ ਮੋਬਾਈਲ ਫੋਨ ਤੋਂ ਇਸ ਕਾਰਵਾਈ ਦੀ ਵੀਡੀਓ ਟੇਪ ਕੀਤੀ।

NIA ਕਰੇਗੀ ਮਾਮਲੇ ਦੀ ਜਾਂਚ

ਉਦੈਪੁਰ ‘ਚ ਦਰਜ਼ੀ ਦੀ ਹੱਤਿਆ ਦੀ ਘਟਨਾ ਨੂੰ ਅੱਤਵਾਦੀ ਕਾਰਵਾਈ ਕਰਾਰ ਦਿੰਦੇ ਹੋਏ ਕੇਂਦਰ ਨੇ ਬੁੱਧਵਾਰ ਨੂੰ ਰਾਸ਼ਟਰੀ ਜਾਂਚ ਏਜੰਸੀ (ਐੱਨ. ਆਈ. ਏ.) ਨੂੰ ਜਾਂਚ ਆਪਣੇ ਹੱਥ ‘ਚ ਲੈਣ ਅਤੇ ਇਸ ‘ਚ ਕਿਸੇ ਸੰਗਠਨ ਜਾਂ ਅੰਤਰਰਾਸ਼ਟਰੀ ਸ਼ਮੂਲੀਅਤ ਦਾ ਪਤਾ ਲਗਾਉਣ ਦੇ ਨਿਰਦੇਸ਼ ਦਿੱਤੇ ਹਨ। ਇਸ ਦੌਰਾਨ ਉਦੈਪੁਰ ਦੇ ਸੱਤ ਥਾਣਾ ਖੇਤਰਾਂ ਵਿੱਚ ਕਰਫਿਊ ਲਗਾ ਦਿੱਤਾ ਗਿਆ ਹੈ, ਜਦਕਿ ਰਾਜਸਥਾਨ ਦੇ ਸਾਰੇ 33 ਜ਼ਿਲ੍ਹਿਆਂ ਵਿੱਚ ਮੋਬਾਈਲ ਇੰਟਰਨੈੱਟ ਸੇਵਾਵਾਂ ਨੂੰ ਮੁਅੱਤਲ ਕਰ ਦਿੱਤਾ ਗਿਆ ਹੈ। ਕਨ੍ਹਈਆ ਲਾਲ ਦੀ ਲਾਸ਼ ਬੁੱਧਵਾਰ ਨੂੰ ਪੋਸਟਮਾਰਟਮ ਤੋਂ ਬਾਅਦ ਪਰਿਵਾਰ ਨੂੰ ਸੌਂਪ ਦਿੱਤੀ ਗਈ। ਉਨ੍ਹਾਂ ਦੀ ਅੰਤਿਮ ਯਾਤਰਾ ਉਦੈਪੁਰ ਦੇ ਸੈਕਟਰ-14 ਸਥਿਤ ਉਨ੍ਹਾਂ ਦੇ ਘਰ ਤੋਂ ਸਖ਼ਤ ਸੁਰੱਖਿਆ ਵਿਚਕਾਰ ਸ਼ੁਰੂ ਕੀਤੀ ਗਈ, ਜਿਸ ਵਿਚ ਸੈਂਕੜੇ ਲੋਕਾਂ ਨੇ ਸ਼ਿਰਕਤ ਕੀਤੀ।