ਕੇਸਰੀ ਨਿਊਜ਼ ਨੈਟਵਰਕ: ਅਮਰੀਕਾ ਦੇ ਟੈਕਸਾਸ ਸੂਬੇ ‘ਚ ਇਕ ਟਰੈਕਟਰ-ਟ੍ਰੇਲਰ ‘ਚ 46 ਪ੍ਰਵਾਸੀਆਂ ਦੀਆਂ ਲਾਸ਼ਾਂ ਮਿਲੀਆਂ ਹਨ। ਸੈਨ ਐਂਟੋਨੀਓ ਦੇ ਦੱਖਣ-ਪੱਛਮ ਵਿੱਚ ਲਾਸ਼ਾਂ ਨਾਲ ਭਰਿਆ ਇੱਕ ਟਰੈਕਟਰ-ਟ੍ਰੇਲਰ ਮਿਲਿਆ ਹੈ। ਸੈਨ ਐਂਟੋਨੀਓ ਦੇ ਕੇਸੈਟ ਟੈਲੀਵਿਜ਼ਨ ਨੇ ਦੱਸਿਆ ਕਿ ਇਹ ਲੋਕ ਦੱਖਣੀ ਟੈਕਸਾਸ ਵਿੱਚ ਪ੍ਰਵਾਸੀ ਤਸਕਰੀ ਦੌਰਾਨ ਮਾਰੇ ਗਏ ਸਨ। ਨਿਊਜ਼ ਏਜੰਸੀ ਏਐਫਪੀ ਨੇ ਅਮਰੀਕੀ ਮੀਡੀਆ ਦੇ ਹਵਾਲੇ ਨਾਲ ਇਹ ਖ਼ਬਰ ਦਿੱਤੀ ਹੈ। ਮੀਡੀਆ ਰਿਪੋਰਟਾਂ ਦੇ ਅਨੁਸਾਰ, ਲਾਸ਼ਾਂ ਵਾਲਾ ਵਾਹਨ ਡਾਊਨਟਾਊਨ ਸੈਨ ਐਂਟੋਨੀਓ ਦੇ ਦੱਖਣੀ ਬਾਹਰੀ ਹਿੱਸੇ ਵਿੱਚ ਇੱਕ ਦੂਰ-ਦੁਰਾਡੇ ਖੇਤਰ ਵਿੱਚ ਰੇਲਮਾਰਗ ਦੀਆਂ ਪਟੜੀਆਂ ਦੇ ਨੇੜੇ ਮਿਲਿਆ ਸੀ।
ਸੈਨ ਐਂਟੋਨੀਓ ਪੁਲਿਸ ਨੇ ਅਜੇ ਤੱਕ ਇਸ ਬਾਰੇ ਅਧਿਕਾਰਤ ਬਿਆਨ ਨਹੀਂ ਦਿੱਤਾ ਹੈ। ਸੈਨ ਐਂਟੋਨੀਓ ਵਿੱਚ ਮੈਕਸੀਕਨ ਜਨਰਲ ਕੌਂਸਲੇਟ ਨੇ ਕਿਹਾ ਕਿ ਕੌਂਸਲ ਜਨਰਲ ਰੂਬੇਨ ਮਿੰਟੀ ਘਟਨਾ ਸਥਾਨ ਲਈ ਰਵਾਨਾ ਹੋ ਗਏ ਹਨ। ਮੈਕਸੀਕੋ ਦੇ ਵਿਦੇਸ਼ ਮੰਤਰੀ ਮਾਰਸੇਲੋ ਐਬਰਾਡ ਨੇ ਕਿਹਾ ਕਿ ਪੀੜਤਾਂ ਦੀ ਕੌਮੀਅਤ ਅਜੇ ਪਤਾ ਨਹੀਂ ਲੱਗ ਸਕੀ ਹੈ। ਐਬਾਰਡ ਨੇ ਟਵੀਟ ਕੀਤਾ, ‘ਟੈਕਸਾਸ ਵਿੱਚ ਤ੍ਰਾਸਦੀ। ਬੰਦ ਟਰਾਲੇ ਵਿੱਚ ਦਮ ਘੁਟਣ ਕਾਰਨ ਪ੍ਰਵਾਸੀਆਂ ਦੀ ਮੌਤ ਹੋਣ ਦਾ ਖਦਸ਼ਾ ਹੈ। ਮੈਕਸੀਕਨ ਕੌਂਸਲਰ ਅਪਰਾਧ ਵਾਲੀ ਥਾਂ ਲਈ ਰਵਾਨਾ ਹੋ ਗਿਆ ਹੈ।