ਨਵੀਂ ਦਿੱਲੀ, (ਕੇਸਰੀ ਨਿਊਜ਼ ਨੈੱਟਵਰਕ) : ਭਾਰਤੀ ਰੇਲਵੇ ਨੇ ਟਿਕਟ ਬੁਕਿੰਗ ਦੌਰਾਨ ਯਾਤਰੀਆਂ (Rail Ticket Booking IRCTC) ਨੂੰ ਵੱਡੀ ਸਹੂਲਤ ਦਿੱਤੀ ਹੈ। ਆਉਣ ਵਾਲੇ ਦਿਨਾਂ ‘ਚ ਟਿਕਟ ਬੁਕਿੰਗ ਦੌਰਾਨ ਯਾਤਰੀਆਂ ਨੂੰ ਆਪਣਾ ਪਤਾ ਨਹੀਂ ਦੇਣਾ ਪਵੇਗਾ। ਰੇਲਵੇ ਬੋਰਡ ਨੇ ਇਹ ਜਾਣਕਾਰੀ ਮੰਗਣ ‘ਤੇ ਤੁਰੰਤ ਪ੍ਰਭਾਵ ਨਾਲ ਪਾਬੰਦੀ ਲਗਾ ਦਿੱਤੀ ਹੈ। ਬੋਰਡ ਨੇ ਕਿਹਾ ਹੈ ਕਿ ਸਾਰੇ ਜ਼ੋਨਲ ਰੇਲਵੇ ਨੂੰ ਇਸ ਦਿਸ਼ਾ ‘ਚ ਤੁਰੰਤ ਕਾਰਵਾਈ ਕਰਨ। ਹੁਣ IRCTC ਸਾਫਟਵੇਅਰ ‘ਚ ਬਦਲਾਅ ਕਰੇਗਾ।

ਪੈਸੰਜਰ ਦਾ ਪਤਾ ਦਰਜ ਕਰਨ ਦੇ ਹੁਕਮਾਂ ‘ਤੇ ਮੰਗੀ ਸਫ਼ਾਈ

ਰੇਲਵੇ ਬੋਰਡ ਦੇ ਹੁਕਮ ਮੁਤਾਬਕ Zonal RaIlways ਨੇ ਟਿਕਟ ਬੁਕਿੰਗ ਦੌਰਾਨ ਪੈਸੰਜਰ ਦਾ ਪਤਾ ਦਰਜ ਕਰਨ ਦੇ ਹੁਕਮ ‘ਤੇ ਸਫ਼ਾਈ ਮੰਗੀ ਸੀ। ਉਨ੍ਹਾਂ ਦਾ ਕਹਿਣਾ ਸੀ ਕਿ ਹੁਣ Covid Containment Measure ਖ਼ਤਮ ਹੋ ਚੁੱਕੇ ਹਨ ਤਾਂ ਕੀ ਅਜਿਹੇ ਵਿਚ ਯਾਤਰੀਆਂ ਨੂੰ ਹਾਲੇ ਵੀ ਘਰ ਦਾ ਪਤਾ ਦਰਜ ਕਰਨ ਲਈ ਕਹਿਣਾ ਪਵੇਗਾ। ਇਸ ‘ਤੇ ਬੋਰਡ ਨੇ ਇਸ ਵਿਵਸਥਾ ‘ਚ ਤੁਰੰਤ ਪ੍ਰਭਾਵ ਨਾਲ ਬਦਲਾਅ ਦਾ ਹੁਕਮ ਦਿੱਤਾ। ਬੋਰਡ ਨੇ ਕਿਹਾ ਕਿ ਗ੍ਰਹਿ ਮੰਤਰਾਲੇ ਨਾਲ ਗੱਲਬਾਤ ਤੋਂ ਬਾਅਦ ਤੈਅ ਹੋਇਆ ਹੈ ਕਿ ਇਸ ਵਿਵਸਥਾ ਨੂੰ ਖ਼ਤਮ ਕਰ ਦਿੱਤਾ ਜਾਵੇ।

31 ਮਾਰਚ ਤੋਂ ਬਾਅਦ ਕੋਵਿਡ ਕੰਟੇਨਮੈਂਟ ਉਪਾਅ ਹੋ ਗਏ ਐਕਸਪਾਇਰ

ਰੇਲਵੇ ਬੋਰਡ ਨੇ ਦੱਸਿਆ ਕਿ ਇਸ ਬਾਰੇ ਗ੍ਰਹਿ ਮੰਤਰਾਲੇ ਤੋਂ ਸਲਾਹ ਲਈ ਗਈ ਸੀ। ਗ੍ਰਹਿ ਮੰਤਰਾਲੇ ਨੇ ਜਵਾਬ ‘ਚ ਕਿਹਾ ਕਿ 31 ਮਾਰਚ 2022 ਤੋਂ ਬਾਅਦ ਕੋਈ ਵੀ Covid Containment ਉਪਾਅ ਲਾਗੂ ਨਹੀਂ ਰਹੇਗਾ। ਇਸ ਲਈ ਫੈ਼ਸਲਾ ਲਿਆ ਗਿਆ ਹੈ ਕਿ ਹੁਣ ਯਾਤਰੀਆਂ ਤੋਂ ਰਿਜ਼ਰਵੇਸ਼ਨ ਦੌਰਾਨ ਉਨ੍ਹਾਂ ਦੇ ਪਤੇ ਨੂੰ ਦਰਜ ਕਰਨ ਲਈ ਨਹੀਂ ਕਿਹਾ ਜਾਵੇਗਾ। ਇਸ ਦੇ ਲਈ ਸਾਫਟਵੇਅਰ ‘ਚ ਵੀ ਬਦਲਾਅ ਕੀਤਾ ਜਾਵੇਗਾ।