ਚੰਡਿਗੜ੍ਹ, 21 ਅਪ੍ਰੈਲ (ਕੇਸਰੀ ਨਿਊਜ਼ ਨੈੱਟਵਰਕ) : ਪਹਿਲਾਂ ਗਰਮੀ ਤੇ ਹੁਣ ਅਸਮਾਨੀ ਚੜ੍ਹੇ ਹਨੇਰੀ ਝੱਖੜ ਨਾਲ ਵਿਗੜੇ ਮੌਸਮ ਦੇ ਮਿਜਾਜ਼ ਨੂੰ ਵੇਖ ਕਿਸਾਨਾਂ ਵੱਲੋਂ ਕਣਕ ਦੀ ਵਾਢੀ ‘ਚ ਤੇਜ਼ੀ ਲਿਆਂਦੀ ਹੈ। ਜਦ ਕਿ ਦੂਜੇ ਪਾਸੇ ਜਿਮੀਂਦਾਰਾਂ ਨੂੰ ਲੇਵਰ ਤੇ ਮਸ਼ੀਨਰੀ ਦੀ ਘਾਟ ਨੇ ਵੀ ਚਿੰਤਾ ਵਧਾਈ ਹੋਈ ਹੈ। ਸਬ ਡਵੀਜ਼ਨ ਬਲਾਚੌਰ ਦੇ ਵੱਖ-ਵੱਖ ਪਿੰਡਾਂ ‘ਚ ਅੱਜ ਵੀ ਕਿਸਾਨਾਂ ਨੂੰ ਕਣਕ ਦੀ ਵਾਢੀ ਕਰਾਉਂਦੇ ਵੇਖਿਆ ਗਿਆ ਹੈ। ਜਿਨਾਂ੍ਹ ਦਾ ਕਹਿਣਾ ਹੈ ਕਿ ਕਿਸਾਨਾਂ ਨੂੰ ਜਿੱਥੇ ਪਹਿਲੋ ਹੀ ਇਸ ਵਾਰੀ ਜ਼ਿਆਦਾ ਗਰਮੀ ਪੈਣ ਕਾਰਨ ਕਣਕ ਦੇ ਘੱਟ ਝਾੜ ਕਾਰਨ ਨੁਕਸਾਨ ਝੱਲਣਾ ਪੈ ਰਿਹਾ ਹੈ।

ਉਪਰ ਤੋਂ ਅਜਿਹੇ ‘ਚ ਜੇਕਰ ਮੀਂਹ ਪੈ ਜਾਂਦਾ ਹੈ ਤਾਂ ਉਨ੍ਹਾਂ ਦਾ ਹੋਰ ਵੀ ਨੁਕਸਾਨ ਹੋਣ ਦਾ ਖਤਰਾ ਬਣਿਆ ਹੋਇਆ ਹੈ। ਉਨ੍ਹਾਂ ਸਰਕਾਰ ਤੋਂ ਮੰਗ ਕੀਤੀ ਕਿ ਕਿਸਾਨ ਜਿਹੜੇ ਕਿ ਪਹਿਲੋ ਹੀ ਆਰਥਿਕ ਮੰਦੀ ਦਾ ਸ਼ਿਕਾਰ ਹੋ ਕੇ ਕੱਖੋ ਹੋਲੇ ਹੋ ਚੁੱਕੇ ਹਨ, ਨੂੰ ਰਾਹਤ ਦੇਵੇ। ਦੂਜੇ ਪਾਸੇ ਦਾਣਾ ਮੰਡੀ ਬਲਾਚੌਰ ‘ਚ ਵੀ ਮੌਸਮ ਦੇ ਵਿਗੜੇ ਮਿਜਾਜ਼ ਨੂੰ ਵੇਖਦਿਆਂ ਕਿਸਾਨਾਂ ਦੇ ਸਾਹ ਸੂਤੇ ਹੋਏ ਹਨ। ਜਿਨਾਂ੍ਹ ਨੇ ਕੜੀ ਮਿਹਨਤ ਅਤੇ ਮਹਿੰਗੇ ਭਾਅ ਦੇ ਡੀਜ਼ਲ ਅਤੇ ਦਵਾਈਆਂ ਨਾਲ ਤਿਆਰ ਕੀਤੀ ਕਣਕ ਦੀ ਫਸਲ ਉਹ ਮੰਡੀ ਲਿਆਏ ਹਨ ਪਰ ਮੰਡੀ ‘ਚ ਪਹਿਲੋ ਹੀ ਲਿਫਟਿੰਗ ਨਾ ਹੋਣ ਕਾਰਨ ਬੋਰੀਆਂ ਦੇ ਅੰਬਾਰ ਲੱਗੇ ਹੋਏ ਹਨ। ਜਿਸ ਕਾਰਨ ਉਨਾਂ੍ਹ ਨੂੰ ਫਸਲ ਰੱਖਣ ਲਈ ਵੀ ਥਾਂ ਨਹੀਂ ਮਿਲ ਰਹੀ ਹੈ। ਦਾਣਾ ਮੰਡੀ ਦੀ ਸ਼ੈਡ ਬੋਰੀਆਂ ਨਾਲ ਪੂਰੀ ਤਰਾਂ੍ਹ ਨਾਲ ਭਰੀ ਹੋਈ ਹੈ। ਹੁਣ ਦੇਖਣਾ ਇਹ ਹੋਵੇਗਾ ਕਿ ਸਰਕਾਰ, ਪ੍ਰਸ਼ਾਸਨ ਜਾਂ ਸਬੰਧਤ ਵਿਭਾਗ ਉਕਤ ਮਾਮਲੇ ਨੂੰ ਗੰਭੀਰਤਾ ਨਾਲ ਲੈ ਕੇ ਤੁਰੰਤ ਲਿਫਟਿੰਗ ਦੇ ਉਚੇਚੇ ਪ੍ਰਬੰਧ ਕਰਦਾ ਜਾਂ ਫਿਰ ਆਉਣ ਵਾਲੇ ਸਮੇਂ ‘ਚ ਬਰਸਾਤ ਜਾਂ ਕਣਕ ਨਾਲ ਭਰੀਆਂ ਬੋਰੀਆ ‘ਚੋਂ ਵਜ਼ਨ ਘੱਟਣ ਦੇ ਕਾਰਨ ਕਿਸਾਨ, ਆੜ੍ਹਤੀਆਂ ਅਤੇ ਵੱਖ-ਵੱਖ ਖਰੀਦ ਏਜੰਸੀਆਂ ਦੇ ਅਧਿਕਾਰੀਆਂ ਨੂੰ ਇਕ ਦੂਜੇ ਨਾਲ ਦੋ ਚਾਰ ਹੋਣਾ ਪਵੇਗਾ।

-ਮੌਸਮ ਖਰਾਬ ਹੁੰਦਾ ਵੇਖ ਵਾਢੀ ‘ਚ ਆਈ ਤੇਜ਼ੀ

ਮਾਰਕੀਟ ਕਮੇਟੀ ਬਲਾਚੌਰ ਦੇ ਦਾਣਾ ਮੰਡੀ ਇੰਚਾਰਜ ਬਗੀਚਾ ਸਿੰਘ ਰੱਕੜ ਨਾਲ ਨਾਲ ਜਦ ਗੱਲ ਕੀਤੀ ਤਾਂ ਉਨਾਂ੍ਹ ਆਖਿਆ ਕਿ ਮੰਡੀ ‘ਚ 38580 ਕੁਆਇੰਟਲ ਕਣਕ ਦੀ ਖਰੀਦ ਵੱਖ-ਵੱਖ ਏਜੰਸੀਆਂ ਦੁਆਰਾ ਕੀਤੀ ਗਈ ਹੈ। ਜਿਸ ਵਿਚ 11700 ਦੀ ਲਿਫਟਿੰਗ ਹੋ ਚੁੱਕੀ ਅਤੇ 26880 ਦੀ ਲਿਫਟਿੰਗ ਲਈ ਮੰਡੀ ‘ਚ ਪਈ ਹੈ। ਜਿਹੜੀ ਕਿ ਗੱਡੀਆਂ ਦੀ ਸਪੈਸ਼ਲ ਲਗਾ ਕੇ ਕੁਝ ਜਲਦੀ ਹੀ ਚੁੱਕਵਾ ਦਿੱਤੀ ਜਾਵੇਗੀ।