ਨਵੀਂ ਦਿੱਲੀ 20 ਅਪ੍ਰੈਲ (ਕੇਸਰੀ ਨਿਊਜ਼ ਨੈੱਟਵਰਕ) : ਦਿੱਲੀ ਦੇ ਜਹਾਂਗੀਰਪੁਰੀ ਇਲਾਕੇ ’ਚ ਕਬਜ਼ਿਆਂ ਖ਼ਿਲਾਫ਼ ਕਾਰਵਾਈ ਸ਼ੁਰੂ ਹੋ ਗਈ ਹੈ। ਉੱਤਰੀ ਦਿੱਲੀ ਨਗਰ ਨਿਗਮ ਵੱਲੋਂ ਕਬਜ਼ਿਆਂ ਨੂੰ ਹਟਾਉਣ ਦੀ ਲੜੀ ਤਹਿਤ ਬੁੱਧਵਾਰ ਸਵੇਰੇ ਸਭ ਤੋਂ ਪਹਿਲਾਂ ਕੁਸ਼ਲ ਚੌਕ ’ਤੇ ਡਿੱਚ ਮਸ਼ੀਨਾਂ ਨਾਲ ਰੇਹੜੀ ਵਾਲਿਆਂ ਨੂੰ ਹਟਾਇਆ ਗਿਆ। ਰੇਹੜੀਆਂ ਨੂੰ ਤੋੜਨ ਮਗਰੋਂ ਨਾਜਾਇਜ਼ ਕਬਜ਼ਿਆਂ ਨੂੰ ਹਟਾਇਆ ਗਿਆ। ਕੁਸ਼ਲ ਚੌਕ ’ਚ ਹੀ ਹਨੂੰਮਾਨ ਜਯੰਤੀ ਦੌਰਾਨ ਕੱਢੀ ਗਈ ਸ਼ੋਭਾ ਯਾਤਰਾ ’ਤੇ ਪਥਰਾਅ ਕੀਤਾ ਗਿਆ ਸੀ। ਹੁਣ ਮਸਜਿਦ ਦੇ 100 ਮੀਟਰ ਦੇ ਘੇਰੇ ’ਚ ਨਾਜਾਇਜ਼ ਉਸਾਰੀਆਂ ਨੂੰ ਹਟਾਇਆ ਜਾ ਰਿਹਾ ਹੈ। ਮਸਜਿਦ ਸਾਹਮਣੇ ਕਬਜ਼ੇ ਹਟਾਉਣ ਲਈ ਪੰਜਵੀਂ ਡਿੱਚ ਮਸ਼ੀਨ ਵੀ ਆ ਗਈ ਹੈ। ਭੰਨਤੋੜ ਦੀ ਕਾਰਵਾਈ ਦੌਰਾਨ ਇਹ ਵੀ ਪਤਾ ਲੱਗਿਆ ਹੈ ਕਿ ਨਾਲਿਆਂ ਤੇ ਸੜਕ ’ਤੇ ਰੱਖੇ ਬੋਰਿਆਂ ’ਚ ਪਲਾਸਟਿਕ ਦਾ ਸਾਮਾਨ ਤੇ ਪਲਾਸਟਿਕ ਦੀਆਂ ਬੋਤਲਾਂ ਭਰ ਕੇ ਰੱਖੀਆਂ ਗਈਆਂ ਸਨ।

ਜਹਾਂਗੀਰਪੁਰੀ ਇਲਾਕੇ ’ਚ ਅਗਲੇ ਦੋ ਦਿਨਾਂ ਤਕ ਕਬਜ਼ਿਆਂ ਖ਼ਿਲਾਫ਼ ਕਾਰਵਾਈ ਜਾਰੀ ਰਹੇਗੀ। ਦੂਜੇ ਪਾਸੇ ਡਿੱਚ ਚਾਲਕ ਨੇ ਕਿਹਾ ਕਿ ਕਬਜ਼ਿਆਂ ਖ਼ਿਲਾਫ ਕਾਰਵਾਈ ਤਹਿਤ ਸੜਕਾਂ ’ਤੇ ਬਣੀਆਂ ਝੁੱਗੀਆਂ ਤੇ ਦੁਕਾਨਾਂ ਨੂੰ ਵੀ ਹਟਾਇਆ ਜਾਵੇਗਾ। ਉਥੇ ਹੀ ਸੁਪਰੀਮ ਕੋਰਟ ਨੇ ਬੁੱਧਵਾਰ ਨੂੰ ਸੁਣਵਾਈ ਦੌਰਾਨ ਦਿੱਲੀ ਦੇ ਜਹਾਂਗੀਰਪੁਰੀ ’ਚ ਸ਼ਾਂਤੀਪੂਰਵਕ ਹਾਲਾਤ ਬਣਾਈ ਰੱਖਣ ਲਈ ਕਿਹਾ। ਕਬਜ਼ਿਆਂ ਨੂੰ ਹਟਾਉਣ ਦੀ ਮੁਹਿੰਮ ਵਿਰੁੱਧ ਪਟੀਸ਼ਨ ’ਤੇ ਹੁਣ ਭਲਕੇ ਯਾਨੀ ਵੀਰਵਾਰ ਨੂੰ ਸੁਣਵਾਈ ਹੋਵੇਗੀ। ਲੋਕ ਡਿੱਚ ਮਸ਼ੀਨ ਚੱਲਣ ਦੇ ਖੌਫ਼ ਤੋਂ ਲੋਕ ਡਰਦੇ ਹਨ, ਜਿਸ ਕਾਰਨ ਲੋਕ ਸਮਾਨ ਚੁੱਕ ਕੇ ਭੱਜ ਰਹੇ ਹਨ। ਇਹ ਸਿਲਸਿਲਾ ਬੁੱਧਵਾਰ ਸਵੇਰ ਤੋਂ ਹੀ ਜਾਰੀ ਹੈ। ਦਰਅਸਲ ਬੁੱਧਵਾਰ ਸਵੇਰ ਤੋਂ ਹੀ ਨਾਜਾਇਜ਼ ਕਬਜੇ ਹਟਾਉਣ ਦੀ ਸੂਚਨਾ ਨਾ ਮਿਲਣ ਕਾਰਨ ਲੋਕਾਂ ’ਚ ਇਸ ਦਾ ਡਰ ਵੀ ਦੇਖਿਆ ਜਾ ਰਿਹਾ ਹੈ। ਮੌਕੇ ’ਤੇ ਮੌਜੂਦ ਇਕ ਵਿਅਕਤੀ ਨੇ ਦੱਸਿਆ ਕਿ ਉਹ ਇੱਥੇ ਕੂੜਾ ਇਕੱਠਾ ਕਰਦੇ ਹਨ। ਹੁਣ ਉਹ ਇਸ ਨੂੰ ਹਟਾ ਰਹੇ ਹਨ ਕਿਉਂਕਿ ਸਾਨੂੰ ਪਤਾ ਲੱਗਿਆ ਹੈ ਕਿ ਇੱਥੇ ਡਿੱਚ ਮਸ਼ੀਨ ਆਵੇਗੀ।

ਪੁਲਿਸ ਟੀਮ ਨੇ ਕਬਜ਼ੇ ਹਟਾਉਣ ਤੋਂ ਪਹਿਲਾਂ ਲਿਆ ਸਥਿਤੀ ਦਾ ਜਾਇਜ਼ਾ

ਉੱਥੇ ਹੀ ਐੱਮਸੀਡੀ ਵੱਲੋਂ ਐਲਾਨ ਕੀਤੀ ਗਈ ਕਬਜ਼ੇ ਵਿਰੋਧੀ ਮੁਹਿੰਮ ਤੋਂ ਪਹਿਲਾਂ ਡੀਸੀਪੀ ਉੱਤਰੀ ਪੱਛਮੀ ਊਸ਼ਾ ਰੰਗਨਾਨੀ ਨੇ ਪੁਲਿਸ ਟੀਮ ਨਾਲ ਜਹਾਂਗੀਰਪੁਰੀ ਖੇਤਰ ਦਾ ਨਿਰੀਖਣ ਕੀਤਾ। ਦਿੱਲੀ ਪੁਲਿਸ ਨੇ ਬੁੱਧਵਾਰ ਸਵੇਰੇ ਜਹਾਂਗੀਰਪੁਰੀ ’ਚ ਸਥਿਤੀ ਦਾ ਜਾਇਜਜ਼ਾ ਲਿਆ, ਜਿੱਥੇ 16 ਅਪ੍ਰੈਲ ਨੂੰ ਇਕ ਧਾਰਮਿਕ ਜਲੂਸ ਦੌਰਾਨ ਹਿੰਸਾ ਹੋਈ ਸੀ।

ਜਹਾਂਗੀਰਪੁਰੀ ’ਚ ਕਬਜ਼ੇ ਵਿਰੋਧੀ ਮੁਹਿੰਮ ਬਾਰੇ ਰਾਜਾ ਇਕਬਾਲ ਸਿੰਘ (ਮੇਅਰ, ਉੱਤਰੀ ਦਿੱਲੀ ਨਗਰ ਨਿਗਮ ਦਿੱਲੀ) ਦਾ ਕਹਿਣਾ ਹੈ ਕਿ ਇਹ ਸਾਡਾ ਰੁਟੀਨ ਦਾ ਕੰਮ ਹੈ ਕਿ ਅਸੀਂ ਉਸ ਜਗ੍ਹਾ ਨੂੰ ਖ਼ਾਲੀ ਕਰਵਾਉਂਦੇ ਹਾਂ, ਜਿੱਥੇ ਨਾਜਾਇਜ਼ ਉਸਾਰੀ ਅਤੇ ਸਰਕਾਰੀ ਜ਼ਮੀਨਾਂ ’ਤੇ ਕਬਜ਼ੇ ਹਨ। ਅੱਜ (ਬੁੱਧਵਾਰ) ਵੀ ਅਸੀਂ ਅਜਿਹਾ ਹੀ ਕਰਨ ਜਾ ਰਹੇ ਹਾਂ। ਸਾਡਾ ਇਹੀ ਸੁਨੇਹਾ ਹੈ ਕਿ ਲੋਕ ਜਨਤਕ ਜ਼ਮੀਨ ਖ਼ਾਲੀ ਕਰ ਦੇਣ।

ਜ਼ਿਕਰਯੋਗ ਹੈ ਕਿ ਪ੍ਰਦੇਸ਼ ਭਾਜਪਾ ਪ੍ਰਧਾਨ ਆਦੇਸ਼ ਗੁਪਤਾ ਨੇ ਉੱਤਰੀ ਦਿੱਲੀ ਨਗਰ ਨਿਗਮ (ਐੱਨਡੀਐੱਮਸੀ) ਦੇ ਮੇਅਰ ਰਾਜਾ ਇਕਬਾਲ ਸਿੰਘ ਨੂੰ ਪੱਤਰ ਲਿਖ ਕੇ ਕਾਰਵਾਈ ਦੀ ਮੰਗ ਕੀਤੀ ਹੈ। ਅਜਿਹੇ ’ਚ ਮੰਨਿਆ ਜਾ ਰਿਹਾ ਹੈ ਕਿ ਬੁੱਧਵਾਰ ਨੂੰ ਇੱਥੇ ਵੱਡੀ ਕਾਰਵਾਈ ਹੋ ਸਕਦੀ ਹੈ। ਇਸ ਲਈ ਨਿਗਮ ਨੇ 400 ਪੁਲਿਸ ਕਰਮਚਾਰੀ ਮੰਗੇ ਹਨ। ਮੰਗਲਵਾਰ ਨੂੰ ਵੀ ਜਹਾਂਗੀਰਪੁਰੀ ’ਚ ਕਬਾੜੀਆਂ ਦੇ ਕਬਜ਼ੇ ਹਟਾਉਣ ਲਈ ਸੁਰੱਖਿਆ ਦੀ ਮੰਗ ਕੀਤੀ ਗਈ ਸੀ ਪਰ ਪੁਲਸ ਫੋਰਸ ਨਾ ਹੋਣ ਕਾਰਨ ਇਹ ਸੰਭਵ ਨਹੀਂ ਹੋ ਸਕਿਆ।

ਆਦੇਸ ਗੁਪਤਾ ਨੇ ਆਪਣੇ ਪੱਤਰ ’ਚ ਮੇਅਰ ਨੂੰ ਬੇਨਤੀ ਕੀਤੀ ਹੈ। ਇਸ ਵਿਚ ਉਨ੍ਹਾਂ ਕਿਹਾ ਕਿ 16 ਅਪ੍ਰੈਲ ਨੂੰ ਕੱਢੀ ਗਈ ਸ਼ੋਭਾ ਯਾਤਰਾ ’ਤੇ ਕੁਝ ਸਮਾਜ ਵਿਰੋਧੀ ਅਨਸਰਾਂ ਨੇ ਪਥਰਾਅ ਕੀਤਾ ਸੀ। ਉਨ੍ਹਾਂ ਨੇ ਆਮ ਆਦਮੀ ਪਾਰਟੀ ਦੇ ਸਥਾਨਕ ਆਗੂਆਂ ਦੀ ਸ਼ਹਿ ਹੇਠ ਨਾਜਾਇਜ਼ ਉਸਾਰੀ ਅਤੇ ਕਬਜ਼ੇ ਕੀਤੇ ਹਨ। ਨਾਜਾਇਜ਼ ਉਸਾਰੀਆਂ ਅਤੇ ਕਬਜ਼ਿਆਂ ਦੀ ਨਿਸਾਨਦੇਹੀ ਕਰ ਕੇ ਕਾਰਵਾਈ ਕੀਤੀ ਜਾਵੇ।

ਨਿਗਮ ਨੇ ਡਿਪਟੀ ਕਮਿਸ਼ਨਰ ਪੁਲਿਸ ਨੂੰ ਲਿਖਿਆ ਪੱਤਰ

ਉੱਤਰੀ ਦਿੱਲੀ ਨਗਰ ਨਿਗਮ ਨੇ ਉੱਤਰ-ਪੱਛਮੀ ਜ਼ਿਲ੍ਹੇ ਦੇ ਪੁਲਿਸ ਕਮਿਸ਼ਨਰ ਨੂੰ ਮੰਗਲਵਾਰ ਤੋਂ ਵੀਰਵਾਰ ਤਕ ਕਬਜ਼ਿਆਂ ਵਿਰੁੱਧ ਮੁਹਿੰਮ ਚਲਾਉਣ ਲਈ ਲਿਖਿਆ ਹੈ। ਇਸ ਸਬੰਧੀ ਨਿਗਮ ਨੇ ਦੱਸਿਆ ਕਿ ਲੋਕ ਨਿਰਮਾਣ ਵਿਭਾਗ ਦੇ ਨਾਲ-ਨਾਲ ਨਿਗਮ ਦੇ ਵੱਖ-ਵੱਖ ਵਿਭਾਗਾਂ ਵੱਲੋਂ ਜਹਾਂਗੀਰਪੁਰੀ ਖੇਤਰ ’ਚ ਕਬਜ਼ਿਆਂ ਖ਼ਿਲਾਫ਼ ਮੁਹਿੰਮ ਚਲਾਈ ਜਾਵੇਗੀ। ਉੱਤਰੀ ਦਿੱਲੀ ਨਗਰ ਨਿਗਮ ਦੇ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਸਮਾਜ ਵਿਰੋਧੀ ਅਨਸਰਾਂ ਨੇ ਕਬਾੜ ਦੇ ਨਾਲ ਸੜਕ ਅਤੇ ਜਨਤਕ ਸੰਪਤੀ ’ਤੇ ਕਬਜ਼ਾ ਕੀਤਾ ਹੋਇਆ ਹੈ। ਅਧਿਕਾਰੀਆਂ ਨੂੰ ਜਹਾਂਗੀਰਪੁਰੀ ਖੇਤਰ ਨੂੰ ਕਬਜ਼ਿਆਂ ਤੇ ਨਾਜਾਇਜ਼ ਉਸਾਰੀਆਂ ਤੋਂ ਮੁਕਤ ਕਰਨ ਦੇ ਨਿਰਦੇਸ਼ ਦਿੱਤੇ ਗਏ ਹਨ। ਇਸ ਲਈ ਬੁੱਧਵਾਰ ਨੂੰ ਦਿਨ ਦੇ ਕਿਸੇ ਵੀ ਸਮੇਂ ਕਾਰਵਾਈ ਕੀਤੀ ਜਾ ਸਕਦੀ ਹੈ।

ਉਥੇ ਹੀ ਰਾਜਾ ਇਕਬਾਲ ਸਿੰਘ, ਮੇਅਰ, ਉੱਤਰੀ ਦਿੱਲੀ ਨਗਰ ਨਿਗਮ ਦਾ ਕਹਿਣਾ ਹੈ ਕਿ ਜ਼ੋਨਲ ਅਧਿਕਾਰੀਆਂ ਨੇ ਮੰਗਲਵਾਰ ਨੂੰ ਵੀ ਸੁਰੱਖਿਆ ਦੀ ਮੰਗ ਕੀਤੀ ਸੀ ਪਰ ਪੁਲਸ ਫੋਰਸ ਨਾ ਹੋਣ ਕਾਰਨ ਕਾਰਵਾਈ ਨਹੀਂ ਹੋ ਸਕੀ। ਅੱਜ ਫਿਰ ਕਾਰਵਾਈ ਕਰਨਗੇ।