Mansa (kesari News Network)- AAP ਸੁਪਰੀਮੋ ਅਰਵਿੰਦ ਕੇਜਰੀਵਾਲ ਖ਼ਿਲਾਫ਼ ਦਿੱਲੀ ਸਟੇਟ ਆਂਗਨਵਾੜੀ ਵਰਕਰਜ਼ ਐਂਡ ਹੈਲਪਰਜ਼ ਯੂਨੀਅਨ ਵੱਲੋਂ ਇੱਥੋਂ ਦੇ ਬਾਜ਼ਾਰਾਂ ’ਚ ‘ਕੇਜਰੀਵਾਲ’ ਦੀਆਂ ਵਾਅਦਾ ਖ਼ਿਲਾਫ਼ੀ ਵਿਰੁੱਧ ਰੋਸ ਜ਼ਾਹਿਰ ਕਰਦੀਆਂ ਫਲੈਕਸਾਂ ਫੜ ਕੇ ਰੋਸ ਪਰਗਟ ਕੀਤਾ ਗਿਆ। ਇਨ੍ਹਾਂ ਆਂਗਨਵਾੜੀ ਵਰਕਰਾਂ ਨੇ ਗੁਰਦੁਆਰਾ ਚੌਕ, ਠੀਕਰੀ ਵਾਲਾ ਚੌਕ, ਬਸ ਅੱਡਾ  ਕਚਹਿਰੀ ਰੋਡ, ਤਿੰਨ ਕੋਨੀ ਤੋਂ ਇਲਾਵਾ ਰੇਲਵੇ ਫਾਟਕ ਸਬਜ਼ੀ ਮੰਡੀ ’ਚ ਕੇਜਰੀਵਾਲ ਖ਼ਿਲਾਫ਼ ਰੋਸ ਪ੍ਰਦਰਸ਼ਨ ਕੀਤਾ।

ਇਸ ਦੌਰਾਨ ਪੁੱਜੀਆਂ ਆਂਗਨਵਾੜੀ ਵਰਕਰਾਂ ਨੇ ਕਿਹਾ ਕਿ ਦਿੱਲੀ ਦੀਆਂ ਆਂਗਨਵਾੜੀ ਕਰਮਚਾਰੀ ਆਪਣੀਆਂ ਜ਼ਮਹੂਰੀ, ਸੰਵਿਧਾਨਕ ਤੇ ਬੁਨਿਆਦੀ ਮੰਗਾਂ ਨੂੰ ਲੈ ਕੇ 31 ਜਨਵਰੀ ਤੋਂ ਅਣਮਿਥੇ ਸਮੇਂ ਲਈ ਹੜਤਾਲ ’ਤੇ ਦਿੱਲੀ ਦੀ ਸਿਵਲ ਲਾਈਨਜ਼ ਵਿਚ ਮੁੱਖ ਮੰਤਰੀ ਦੀ ਰਿਹਾਇਸ਼ ਤੋਂ ਸਿਰਫ਼ 200 ਮੀਟਰ ਦੂਰ ਬੈਠੀਆਂ ਹਨ। ਇਸ ਦੇ ਬਾਵਜੂਦ ਵੀ ਅਜੇ ਤਕ ‘ਆਪ’ ਦਾ ਕੋਈ ਵੀ ਨੁਮਾਇੰਦਾ ਸੰਘਰਸ਼ੀ ਔਰਤਾਂ ਨਾਲ ਗੱਲ ਕਰਨ ਤਕ ਨਹੀਂ ਆਇਆ। ਜਦ ਕਿ ਦੂਜੇ ਪਾਸੇ ਕੇਜਰੀਵਾਲ ਪੰਜਾਬ, ਗੋਆ ਤੇ ਉਤਰਾਖੰਡ ਦੀਆਂ ਆਂਗਨਵਾੜੀ ਵਰਕਰਾਂ ਦੇ ਵੋਟ ਬਟੋਰਨ ਲਈ ‘ਦਿੱਲੀ ਮਾਡਲ’ ਦੀਆਂ ਤਰੀਫ਼ਾਂ ਦੇ ਝੂਠੇ ਪੁਲ਼ ਬੰਨ੍ਹ ਰਿਹਾ ਹੈ।

ਉਨ੍ਹਾਂ ਕਿਹਾ ਕਿ ਕੇਂਦਰ ਦੀ ਮੋਦੀ ਸਰਕਾਰ ਤੇ ਦਿੱਲੀ ਦੀ ਕੇਜਰੀਵਾਲ ਸਰਕਾਰ ‘ਸਮੇਕਿਤ ਬਾਲ ਵਿਕਾਸ ਪਰਿਯੋਜਨਾ’ ਨੂੰ ਤਬਾਹ ਕਰਨ ਵਿਚ ਲੱਗੀਆਂ ਹੋਈਆਂ ਹਨ। ਇਸ ਜਨ-ਕਲਿਆਣਕਾਰੀ ਸਕੀਮ ਵਿਚ ਐੱਨਜੀਓ ਦੀ ਘੁਸਪੈਠ ਕਰਵਾਈ ਜਾ ਰਹੀ ਹੈ। ਆਂਗਨਵਾੜੀਆਂ ਨੂੰ ਵੀ ਲੋਕ-ਵਿਰੋਧੀ ‘ਨਵੀਂ ਸਿੱਖਿਆ ਨੀਤੀ’ ਦੇ ਦਾਇਰੇ ਵਿਚ ਲਿਆਂਦਾ ਜਾ ਰਿਹਾ ਹੈ। ਕੇਂਦਰ-ਰਾਜ ਦੀਆਂ ਲੋਕ-ਵਿਰੋਧੀ ਅਤੇ ਕਰਮਚਾਰੀ ਵਿਰੋਧੀ ਨੀਤੀਆਂ ਕਾਰਨ ਸਾਨੂੰ ਹੜਤਾਲ ’ਤੇ ਜਾਣ ਲਈ ਮਜਬੂਰ ਹੋਣਾ ਪਿਆ ਹੈ।

ਅਸੀਂ ਪੰਜਾਬ ਦੇ ਮਿਹਨਤਕਸ਼ ਸਾਥੀਆਂ ਤੇ ਇਨਸਾਫ਼-ਪਸੰਦ ਨਾਗਰਿਕਾਂ ਨੂੰ ਅਪੀਲ ਕਰਦੇ ਹਾਂ ਕਿ ਨਿਆਂ ਦੀ ਇਸ ਲੜਾਈ ਵਿਚ ਸਾਡਾ ਸਮਰਥਨ ਕਰੋ, ਸਾਡਾ ਸਾਥ ਦਿਓ ਤੇ ਸਾਡਾ ਹੌਸਲਾ ਵਧਾਓ। ਸਾਡੀ ਇਹ ਵੀ ਬੇਨਤੀ ਹੈ ਕਿ ਸਮਾਂ ਕੱਢ ਕੇ ਸਾਡੀ ਯੂਨੀਅਨ ਦੇ ਪਰਦਾਫਾਸ਼ ਦਸਤੇ ਵਿਚ ਸ਼ਾਮਲ ਹੋਵੋ ਅਤੇ ਫਰਜ਼ੀਵਾਲ ਦਾ ਸੱਚ ਪੰਜਾਬ ਦੀ ਵਿਆਪਕ ਲੋਕਾਈ ਸਾਹਮਣੇ ਰੱਖੋ